Нийслэлийн Засаг даргын Тамгын газар, Онцгой байдлын ерөнхий газартай хамтран зохион байгуулж буй нийслэлийн Гамшгаас хамгаалах иж бүрэн сургууль өнөөдөр /2019.04.24/ эхэлсэн тухай мэдээллийг хүргэсэн. Тэгвэл үдээс хойшхи сургууль танхимын команд штабын дадлага сургуулилалтаар үргэлжиллээ.
Танхимын команд штабын сургууль хийхдээ дадлага сургуулийн удирдагчаас нийслэлийн Засаг дарга бөгөөд Онцгой комиссын даргад цагийн байдал хүргүүлж, тухайн газар хөдөлж, гамшиг осол тохиолдсон нөхцөлд холбогдох байгууллагууд ямар зохион байгуулалтаар хамтарч ажиллах, уялдаа холбоогоо сайжруулах, үүссэн эрсдэлийг хэрхэн түргэн шуурхай шийдвэрлэх талаар санал боловсруулан танилцуулж байгаа юм.
Мөн өмнө мэдээлсэн цагийн байдал 1/А буюу нийслэл хотын хэмжээнд барилга байгууламжийн 80 орчим хувь нь нурж, 60,000 хүн өртсөн, 20,000 орчим айл өрх орон гэргүй болсон гамшиг бодитой тохиолдсон нөхцөлд Монгол Улсын Засгийн газар, нийслэл дүүргийн удирдлагууд, бүх шатны төр захиргааны байгууллага, ААН, гадаад, дотоодын иргэний нийгмийн байгууллагууд ямар төлөвлөгөөний дагуу ажиллах, тохиолдсон осол гамшгийн үеэр хэрхэн зохион байгуулалтад орох, хүн хүч болон материаллаг эд зүйлс, техник хэрэгслийн нөөцийг нарийн тооцоолон гамшиг эрсдэлийг давах төлөвлөгөө гарган ажиллаж байна.
Энэ талаар ОБЕГ-ын дэд дарга, хурандаа Б.Ууганбаяр “Ажлыг төлөвлөдөг, зохион байгуулдаг, судалгаатай, системтэй явуулдаг арга зүйг эзэмшихийн тулд өнөөдөр бид энд ажиллаж байна. Эхэлсэн бол энэ ажлыг бид заавал үр дүнд хүрч дуусгана. Мэдээллийн урсгалыг хурдан шуурхай болгож уялдаа холбоотойгоох нягтарч баг болж ажилла” гэдгийг хатуу хэллээ.
Ингээд өнөөдрийн танхимын команд штабын сургууль өндөрлөж, маргааш /2019.04.25/ цагийн байдал 1/А нөхцөл байдлын үр дүнг тайлбарлахаар боллоо гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
