Нийслэлийн МАН-ын 94 жилийн түүхэн ойн баярын хурал өнөөдөр Тусгаар тогтнолын ордонд боллоо. Хуралд МАН-ын Ерөнхий нарийн бичгийн дарга Д.Амарбаясгалан, Нийслэлийн намын хорооны дэд дарга Н.Алтаншагай, УИХ-ын гишүүн Н.Учрал, Х.Нямбаатар, Б.Саранчимэг нарын дүүргүүдийн МАН-ын хорооны удирдлагууд, үе үеийн МАН-ын гишүүд оролцлоо.
Баярын хурлын арга хэмжээг нээн Нийслэлийн МАН-ын хорооны дэд дарга Н.Алтаншагай нээж хэлсэн үгэндээ “Түүхийн олон сорилт, ялалт ялагдлыг туулж үүргээ нэр төртэй биелүүлэн бидэнд өвлүүлсэн ахмад, дунд үеийн зүтгэлтнүүдийнхээ залгамж болсон бид нэр төртэй хариуцлагатай үүрэг хүлээсэн гэж итгэж хичээн зүтгэж байна.
Эдүгээ Нийслэлийн Монгол Ардын Намын хороо нийслэлийн есөн дүүргийн дөч гаруй мянган намын гишүүдийг эгнээндээ нэгтгэн улс орны хөгжил, намын ялалт, эв нэгдлийн төлөө хамтдаа тэмүүлсээр байна” гэлээ.
Тэрбээр мөн “Нийслэлийн МАН-ын хороо намын Удирдах зөвлөлөөс дэвшүүлсэн намын анхан шатны байгууллагын бүтцийг өөрчлөх, намын гишүүдийн тоог нэмэгдүүлэх эрс нэмэгдүүлэх, “Цахим нам” болох, 2020 оны бүх шатны сонгуульд ялалт байгуулах зэрэг томоохон зорилтуудыг биелүүлэх чиглэлд олон ажлыг төлөвлөн шат дараатай хэрэгжүүлэн ажиллаж байна.
Монгол улсынхаа тусгаар тогтнол, бүрэн эрхт байдлын баталгаа болж төр түмнийхээ төлөө зүтгэж ирсэн Монгол Ардын Нам, түүний дотор Нийслэлийн Монгол Ардын Намын хорооны үе үеийн удирдлага, гишүүд дэмжигчид та бүхэндээ ажил хөдөлмөр, амьдрал бүтээлд нь өндөр амжилт хамгийн сайн сайхан бүхнийг хүсэн ерөөе” хэмээсэн юм.
МАН-ын Ерөнхий нарийн бичгийн дарга Д.Амарбаясгалан мөн нийт хүрэлцэн ирсэн Нийслэлийн МАН-ын нийт гишүүд төлөөлөгчиддөө хандаж үг хэллээ.
Тэрбээр “БНМАУ-ын анхдугаар үндсэн хуулийг баталсан Улсын их хурал 1924 оны 10 дугаар сарын 29-ний өдрийн 14 дүгээр хуралдаанаар Нийслэл хүрээг БНМАУ-ын Нийслэл хот хэмээн зарлаж, нэрийг нь Улаанбаатар хэмээн тогтоосон.
Дэлхийн соёл иргэншлээс зуунаар хоцрогдсон нүүдэлчдийн сууринг Тусгаар тогтносон Монгол орны улс төр эдийн засаг, соёл шинжлэх ухааны төв болгон хөгжүүлэх үүргийг МАН тухайн үед өөртөө хүлээсэн юм. Улаанбаатар хот дэлхийн хөгжлийн хот болон хөгжихөд Нийслэлийн МАН-ын хорооны удирдлага, намын олон мянган гишүүдийн хамтын хүч хөдөлмөр сэтгэл зүтгэлээ зориулж, гол үүргийг гүйцэтгэж ирлээ.
Энэ хотыг бүтээн байгуулсан МАН-ын хороог удирдаж байсан, гардан гүйцэтгэж байсан гишүүд эрхэм хүндтэй ахмадууд маань хүрэлцэн ирсэн байна. Та бүхэндээ баяр хүргэж, эрүүл энх сайн сайхан бүхнийг хүсэн ерөөе” гэлээ.
Мөн энэ үеэр Ерөнхий нарийн бичгийн дарга Д.Амарбаясгалан МАН-ын цаашдын зорилго, хийх ажлуудаа намын гишүүддээ танилцуулав.
Одоогоос 94-н жилийн тэртээ Сүхбаатарын клубт Анхдугаар их хурлаа хийж үйл ажиллагаагаа эхэлж байсан Нийслэлийн Монгол Ардын Намын хороо хэмээх энэ их айл зөвхөн намын төдийгүй Нийслэлийн хөгжлийн алхам бүрт өөрийн гэсэн үнэтэй хувь нэмрээ оруулж ирсэн түүхтэй.
Иймд түүхэн энэ өдрөө Нийслэлийн МАН нам олон шинэ залуусаар эгнээгээ өргөтгөсний зэрэгцээ шилдэг тэргүүний намын гишүүдэд шагнал гардуулах ёслолын ажиллагаа болсон юм.
Мөн ойн хүндэтгэлийн баярын хурлын үеэр 1939 онд намд элссэн, өдгөө 99 насыг зооглож буй буурай Д.Гончигжав гуай Нийслэлийн Монгол Ардын Намын хорооны 94-н жилийн ойн баяр хүргэж, залгамж халаа болсон залуустаа сургаалиа хайраллаа. Түүнчлэн өөрийн залуу нас, хөдөлмөр хүчээ зориулсан намдаа ахмад дайчны сарын тэтгэмжээр хандив өргөлөө. Түүнд Нийслэлийн МАН-ын хорооны дэд дарга Н.Алтаншагай МАН-ын дээд шагнал болох “Тусгаар тогтнол” одонг гардуулан өгсөн юм.
Хурлын үндсэн арга хэмжээний дараа Нийслэлийн Улаанбаатар чуулгын уран бүтээлчдийн баярын концертоор намын гишүүддээ бэлэг барилаа.
