Эрүүгийн хуулийн тусгай ангийн 24 дүгээр бүлэгт заасан Хүрээлэн байгаа орчны эсрэг гэмт хэргээс урьдчилан сэргийлэх, энэ төрлийн гэмт хэргийн хор уршгийг иргэд, олон нийтэд таниулах, иргэдийн эрх зүйн мэдлэгийг дээшлүүлэхэд чиглэсэн ухуулга, нөлөөлөл, мэдээлэл сурталчилгааны ажлыг зохион байгуулж гэмт хэргийн гаралтыг бууруулах зорилгоор “Байгалиа хамгаалъя” аяныг 2019 оны 04 дүгээр сарын 15-ны өдрөөс 1 сарын хугацаанд улсын хэмжээнд зохион байгуулж байна.
Мөн “Химийн хорт болон аюултай бодисын тухай хууль”-ийн хэрэгжилт, химийн хортой болон аюултай бодис ашигласан гэмт хэрэг, зөрчлөөс урьдчилан сэргийлэх, таслан зогсоох, энэ төрлийн гэмт хэрэг, зөрчлийн талаар авагдсан мэдээ, мэдээлэлд судалгаа, дүн шинжилгээ хийж нөхцөл байдлыг тодорхойлох зорилгоор “Бодис-2019” нэгдсэн арга хэмжээг улсын хэмжээнд 2019 оны 04 дүгээр сарын 15-ны өдрөөс 2019 оны 05 дугаар сарын 15-ны хооронд зохион байгуулж байна.
Дээрх арга хэмжээний хүрээнд арга хэмжээний хүрээнд Баянзүрх дүүрэг дэх цагдаагийн гуравдугаар хэлтэс, Баянзүрх дүүрэг дэх Онцгой байдлын хэлтэс, Мэргэжлийн хяналтын хэлтсүүд хамтран төлөвлөгөө гарган ажлаа нэгтгэсэн бөгөөд хуурайшлын улирал эхэлж байгаатай холбогдуулан мэргэжлийн байгууллагуудаас ой, хээрийн түймрийн аюулаас урьдчилан сэргийлэх анхааруулга сэрэмжлүүлэг өгч, эргүүл шалгалт зохион байгуулан ажиллаж байна.
Нөгөө талаар орон нутагт зорчиж байгаа иргэдийн хайхрамжгүй үйлдэл, техник хэрэгслийн бүрэн бус байдал, хууль бус ан агнах, бугын эвэр түүхээр зорчих гэх мэт үйлдлүүдээс шалтгаалж ой хээрийн түймэр гарч байгаль орчин, иргэдэд асар их хэмжээний хохирол учруулж байгаад иргэд дүгнэлт хийж, байгаль орчинд холбогдолтой гэмт хэрэг, зөрчлийн талаар цагдаагийн байгууллага, байгаль хамгаалагч, улсын байцаагч нарт мэдээ мэдээлэл өгөх зэргээр хамтран ажиллах, мөн энэ төрлийн гэмт хэргээс урьдчилан сэргийлэх бололцоотой бүхий л үйл ажиллагаа явуулж зөв хандлага төлөвшүүлэхийг уриалж байна.
БАЯНЗҮРХ ДҮҮРЭГ ДЭХ ЦАГДААГИЙН ГУРАВДУГААР ХЭЛТЭС МӨРДӨН БАЙЦААХ
ТАСГИЙН ДАРГА ЦАГДААГИЙН ДЭД ХУРАНДАА Б.ЦОГТБААТАР
