М.БААСАНДЭЛГЭР

“Иргэдийн шударга шүүх” ТББ-ын тэргүүн Х.Бат-Ялалт, Хууль зүй, дотоод хэргийн сайд Ц.Нямдоржийг ирэх нэгдүгээр сарын 13-ны өдөр 12:00 цагаас Худалдаа аж үйлдвэрийн танхимд “Шүүх засаглалын ялзрал, хор уршиг түүнийг засах арга зам” сэдэвт  халз мэтгэлцээнд дуудаж байгаагаа мэдэгдлээ.

Тэрээр “Хууль Зүйн салбар ялзарчихсан, Үндсэн хуульд хүлээсэн үүргээ биелүүлдэггүй гэдгийг миний сүүлийн 20 жилийн судалгаа харуулж байна. Манай төрийн бус байгууллага 10 гаран жил шүүхийн алдаатай шийдвэрээс болж хохирсон иргэдийн гомдол мэдээллийг цуглуулж тэдний эрхийг хамгаалахын төлөө зүтгэж байна. Монголыг хуулийн салбар шудрага бус байгааг та бид бүгд харж байна. Салбарын сайд нь хүртэл “шүүх тэгэж л ялзарсан” гээд хэлээд сууж байгаа нь ой гутмаар байна. Мөн Нямдорж сайд намайг ТЕГ-т ажиллаж байсан гэж С1 телевизийн “Цензургүй яриа” нэвтрүүлэгт орж байхдаа гүтгэсэн. Намайг гүтгэсэн учраас Чингэлтэй дүүргийн цагдаагийн хэлтэст гомдол гаргасан ч хүлээж аваагүй. Харин би ТЕГ-т огт ажиллаж байгаагүй гэсэн бичиг надад байгаа. Энэ жижиг асуудлыг хууль хяналтын байгууллага шийдэж чадахгүй байна. Хуулийн салбар бол тоглож болохгүй салбар. Тиймээс энэ бүх асуудлыг шийдэхийн тулд халз мэтгэлцээнд дуудаж байна” гэсэн юм.

Энэ мэтгэлцээн бүх хуульчдад нээлттэй гэдгийг онцлов.