Төрийн байгууллагын ажил өөдтэй, өнгөтэй, олон нийтийн дунд нэр хүнд сайтай байх эсэх нь тухайн газрыг ямар хүн толгойлж байгаагаас ихээхэн шалтгаалдаг билээ. Ёс жудаггүй, хувийн эрх ямба, ашиг хожоо хайсан хоноцын сэтгэлтэй хүнээр удирдуулсан аль ч байгууллага уруудаж доройтно уу гэхээс дэвжиж дээшилдэггүй нь жам ёсных гэлтэй.
Тэгвэл Ж.Дамдинцэрэн гэгч зэрлэг балмад, хувийн шунал нь хэтэрсэн нөхрөөр удирдуулсан Нийслэлийн Соёл, урлагийн газарт өнөөдөр эрүүл саруул ухаантай хүн байтугай амьтан араатан ч тогтоход төвөгтэй болоод байна. Тэрбээр өөрөө ажил хийдэггүй, хийсэн ч хувьдаа авч завшихын төлөө хийсэн болж оромддог атлаа доод албан тушаалтнуудаа “Миний өгсөн үүрэг даалгаврыг биелүүлсэнгүй” хэмээн барьж аваад зодож балбан, үйл тамыг нь үздэг ажээ. Түүний гарт цөөнгүй хүн өртөж эрх нь зөрчигдсөн ч харамсалтай нь тэдгээр хүмүүс ажилдаа үлдэхийн тулд цагдаа, шүүхэд хандалгүй хав дарж өнгөрүүлсээр өдий хүрсэн бололтой. Гэхдээ даравч дардайж, булавч бултайна гэгчээр саяхан түүнд зодуулсан нэгэн ажлаасаа арга буюу халагдсан бөгөөд харин хамт олон нь мань эрийг өмөөрч Ж.Дамдинцэрэнгийн бусад зөрчлүүдийг бөөгнүүлэн бацаж нэгтгээд албан тушаалаас зайлуулахыг шаардан Нийслэлийн Засаг даргад хандсан байх юм.
Ж.Дамдинцэрэнд зодуулсан эрийг Б.Балжинням гэдэг аж. Тэрбээр тус газрын Соёлын үйлчилгээ, оюуны өмчийн асуудал хариуцаж байсан бөгөөд Ж.Дамдинцэрэн дарга нь түүнийг өрөөндөө дуудаж оруулан тийнхүү зодож танхайрсан байв. Ямарч гэм зэмгүй мөрөөрөө ажлаа хийж яваад даргадаа зодуулсныхаа дараа ч тэр бас маш их дарамт шахалтанд өртөж байсан юм шиг байна. Б.Балжинням нь тухайн өдөр даргадаа “Болор Эгшиг” компанид цэнгээт үйлчилгээний газрын тусгай зөвшөөрөл олгож НИТХ-ын тогтоолыг зөрчиж болохгүй, энэ компанийн талаар иргэдээс маш олон гомдол ирсэн” гэж шударгаар үнэнийг хэлснийхээ төлөө зодуулсан гэдгийг хожим гэрчүүд нь нотлоод өгсөн тул тийнхүү хавчигдан гадуурхагдаж, ажлаа амар тайван, чөлөөтэй хийх боломжгүй болж халагджээ.
2016 оны сонгуулийн дараа хотын захирагчаар томилогдсон С.Батболдын ар өвөрт орж гүйж явсаар Нийслэлийн Соёл, урлагийн газрын даргын суудалд заларсан, урьд нь төрийн байгууллагад ажиллаж үзээгүй, хөгжимчин, загвар өмсөгчөөс өөр ажил хийж яваагүй Ж.Дамдинцэрэн гэгч нь сав л хийвэл хувийнхаа ашиг завшааныг урьтал болгож, төсвийн хөрөнгө мөнгө завших дон шүглэсэн мэт болоод байгаа нь түүнийг албан тушаалаас зайлуулах түр хороо байгуулагдахад хүрснээс бэлхнээ харагдаж байна. Тэрбээр 2017 онд эхнэртээ өндөр үнэтэй автомашин бэлэг болгож өгсөн бөгөөд энэхүү хөрөнгө, орлогоо хуулийн дагуу үнэн зөвөөр мэдүүлээгүй тул АТГ-аас түүнд хариуцлага тооцон ажлаас халах, эсвэл албан тушаал бууруулахаар албан бичиг илгээсэн боловч Нийслэлийн тухайн үеийн дарга нар нь цалингийн 30 хувийг хасаж шийтгээд үлдээсэн байв. Мөн 2017 онд Сөүлийн гудамжинд байгуулагдсан “Гэрэлт гудамж” төслийн өдөр тутмын үйл ажиллагааг хариуцах ажилд ямар ч сонгон шалгаруулалтгүйгээр, өөрийн найз нөхөдтэйгөө хамтарч байгуулсан “Юнайтед Инвестмент Партнерс” компаниа оруулаад Нийслэлийн төсвөөс 200 гаруй сая төгрөг гаргуулж авсан байжээ.
Ж.Дамдинцэрэнг албан тушаалаас зайлуулах түр хорооноос Нийслэлийн Засаг даргад илгээсэн шаардах бичигт “2016-2018 онд Нийслэлийн Засаг дарга бөгөөд Улаанбаатар хотын Захирагчаар ажиллаж байсан С.Батболдтой нэр холбогдож, элдэв янзын нэр хоч зүүсэн нь нийслэлийн Соёл, урлагийн газар болон харъяа 11 байгууллага, түүний 300 гаруй ажилчид төдийгүй салбарын нэр хүндийг унагасан, байж боломгүй үйл явдал болсон” гэжээ. Энд “...С.Батболдтой нэр холбогдож...” гэсэн нь ихээхэн анхаарал татаж байна. Энэ талаар зарим эх сурвалжийн хэлж байгаагаар бол “ор хөнжлийн явдал” байхаа магадгүй ажээ. Ер нь түүнийг үтэр түргэн албан тушаалаас зайлуулъя.
О.Баяр
Шуурхай.мн