Худал ярих муухай. Муухайгаар барахгүй бүр зөрчлийн шинжтэй муу зүйл. Харамсалтай нь манай зарим улс төрчид амны зоргоор худлаа шаах юм. Энд шаах гэсэн үг хэрэглэхийн учир гэвэл өнгөрсөн онд Ерөнхий сайд У.Хүрэлсүх УИХ-ын чуулганы танхимд ийм үгээр бусдыгаа дайрч давшилж байсан нь санаанд буухаар нь зориуд дуурайж буй ухаантай юм шүү дээ.
Саяхан Засгийн Хэрэг эрхлэх газрын дарга Л.Оюун-Эрдэнэ гэнэт алга болчихов. Цахим хуудсуудаар түүний фанатууд “Хөл нь гэмтээд эмчилгээ хийлгэхээр Солонгос улс руу ниссэн” хэмээж байлаа. Тэгснээ төд удалгүй нөгөөдүүл нь “Л.Оюун-Эрдэнэ дарга хоолны хордлогонд орсон байна”, “Хэн нэгэн этгээд түүний амийг хорлох гэж оролджээ” гээд л цуурч өгөв. Ингээд дөрөв тав хоногийн турш цахимаар иймэрхүү үл ойлгогдох зүйлүүд эх адаггүй хөврөх нь тэр.
Тэгээд хэд хоногийн дараа Л.Оюун-Эрдэнэ дарга нь Солонгосоос Монголдоо морилж ирлээ. Эргэлзээтэй олон асуудлын эзэн болж буй төрийн түшээ, сайдыг сэтгүүлчид бүчээд авалгүй яав гэж. Хамгийн түрүүнд нүүр тулсан сэтгүүлч бүсгүй түүнээс “Таныг хордлуулсан юм уу” гэж асуулаа. Мань сайд сэтгүүлчийн энэ асуултанд тодорхой хариу өгсөнгүй. Харин хоолны хорлого тусан эмчилгээ хийгээд явж байтал хорлого хөл рүү ороод, мэл засал хийлгээд ирсэн” ухааны юм ярьжээ.
Сайд Л.Оюун-Эрдэнэд тохиолдсон гэх ийм сонин адал явдлын цаана харин арай өөр санаа зорилго нууцлагдаж үлдсэн болов уу гэсэн таамаг төдий зүйлүүд одоо хүмүүсийн амнаас ам дамжин ид яригдаж байна. Үүнтэй холбоотой өөр бас нэг сонирхолтой юм гэвэл Л.Оюун-Эрдэнэ сайд Солонгосоос ирсэн даруйдаа “Ард түмнээсээ уучлалт хүсье” гэв. Энэ нь нэг ёсондоо “Би онцын хүнд өвчин тусаагүй, зүгээр л хувийн ажил гараад Солонгос руу ажлаа таслан байж нисээд ирсэнд уучлаарай” гэсэн үг ажээ. Учир нь мань эр хэрвээ үнэхээр хоолны хордлого туссан бол Монголдоо эмчлүүлж болох байлаа. Манай цэргийн төв эмнэлэгт хордлогын эсрэг яаралтай тусламж, эмчилгээ, үйлчилгээ үзүүлдэг тусгай тасаг олон жилийн өмнөөс ажиллаж, овоо туршлагатай, чанартай эмчилдэг болоод байгаа. Тэнд очсон бол Солонгос руу нисэж мөнгө үрэхгүй амар байхгүй юу.
Л.Оюун-Эрдэнийн сүүлийн үеийн анхаарал татсан өвчлөл буюу түүний өөрийнх нь хэсэнчлэн хоолны хордлого хөл рүү орж хөнгөн мэс засал хийлгэсэн гэдэг нь яг үнэндээ худлаа шаасан хэрэг бололтой. Тэгээд ч нарийн мэргэжлийн эмч нараас лавлахад лав хоолны хордлогоор өвдсөн үед өвчин нь даамжирч хөл рүү ороод булгаа хаван ч юм уу, янз бүрийн сэдрэлтээр мэс засал хийхэд хүргэдэггүй юм байна. Ерөөсөө монголчууд ийм хачирхалтай тохиолдлыг урьд нь огт сонсож байгаагүй юм билээ. Жилийн 365 хоногийн гуравны хоёроос илүү хоног тутамд шахуу баярлаж цэнгэдэг муу зуршилтай манайхан идэж уухаа хэтрүүлээд голцуу хоолны хордлого тусаж эмч рүү гүйлддэг улс. Тэдгээр золгүй хүмүүсээс харин нэг нь ч хоолны хордлого хөл рүү ороод энэ тэрээ гэж юм ярьж байгаагүй, эмчлэгч эмч нар нь ч тийм гайхалтай онош тавиагүй байдаг аж. Тэгэхээр мань төрийн түшээ, сайд гуай энэ удаа яалт ч үгүй худлаа шаасан болж таараад байна. Муухай явдал шүү.
О.Баяр
Шуурхай.мн
