1. Жирэмсэн болон хөхүүл хүүхэдтэй ээжүүдэд сар бүр тэтгэмж олгоно

0-3 насны хүүхдээ асарч байгаа эхэд сар бүр 50 000, гурав ба түүнээс олон хүүхэдтэй, өрх толгойлсон эх /эцэг/-т улиралд нэг удаа 240 000 төгрөгийн дэмжлэг үзүүлэхээр болсон. Жирэмсний таван сартайгаас эхлэн хүүхэд төрүүлэх хүртэл хугацаанд сар бүр 40 000,  хүүхдээ төрүүлсний дараа "Цалинтай ээж" хөтөлбөрийн дагуу 50 000 төгрөгийг үргэлжлүүлэн авна. Гэхдээ 50 болон 40 мянган төгрөгийн тэтгэмжийг нэг эхэд давхцуулан, зэрэг олгохгүй. Мөн 50 000 төгрөгийг зөвхөн ажил эрхлээгүй, гэртээ хүүхдээ асарч буй эхчүүдэд л олгоно.

2. 2018 оноос тэтгэвэрт гарах ээжүүдийн НДШ төлсөн хугацааг нэмж тооцно

Нийгмийн даатгалын сангаас олгох тэтгэвэр, тэтгэмжийн тухай хуульд өөрчлөлт оруулах тухай хууль батлагдсанаар ээжүүдийн НДШ төлсөн хугацаа төрүүлсэн хүүхдийнхээ тоогоор 1.5 жилээр нэмж тооцогдох болж байгаа билээ. Өөрөөр хэлбэл, тухайн ээжийг тэтгэвэрт гарахад нь төрүүлсэн хүүхдийн тоогоор 1.5 жил нэмэгдэж, ажилласан жил нь нэмэгдэнэ. Ингэснээр ажил хийж, НДШ төлсөн хугацаа уртсаж, тэтгэвэр өндөр тогтоолгох боломж бүрдэх юм.

3. НӨАТ-өөс чөлөөлөх тухай

"Баруун бүсийн эрчим хүчний систем” ТӨХК-ийн ОХУ болон БНХАУ-аас импортолж байгаа цахилгаан эрчим хүчийг Гаалийн болон НӨАТ-аас 2021 оны нэгдүгээр сарын нэгний өдрийг хүртэл чөлөөлнө.

4. Засаг захиргаа нутаг дэвсгэрийн нэгж, түүний удирдлагын тухай хууль

Энэ хуулийг УИХ өнгөрсөн сард баталсан. Ингэснээр орон нутаг ИТХ-ын төлөөгчдийн 30 хувь нь төрийн албанд ажиллах боломж бүрдэж буй юм.

5. Малын генетик нөөцийн тухай

Хуулиар малыг үнэлэх, даатгалд хамруулах, худалдах болон малчин дэмжлэг урамшуулалд хамрагдах, зээл авах болон малын бүртгэлийг үндэслэх, малчин өрхийг үндэсний үйлдвэрлэгчээр бүртгэж, гэрчилгээ баталгааны тэмдэг олгох, малчинд мэргэжлийн үнэмлэх олгох зэргийг зохицуулж өгчээ.