ДЭМБ-ын Номхон Далайн баруун бүсийн Захирал Такеши Касай энэ сарын 23-27 ны өдрүүдэд манай улсад ажлын айлчлал хийнэ. Айлчлалын эхний өдөр тун завгүй байсан бөгөөд анхны уулзалтаа Нийслэлийн Засаг дарга бөгөөд Улаанбаатар хотын захирагч С.Амарсайхантай уулзсанаар эхэллүүлээ. Тус уулзалтанд Эрүүл мэндийн сайд Д.Сарангэрэл, Нийслэлийн Эрүүл мэндийн газрын дарга Л.Төмөрбаатар, ЭМЯ-ны Төрийн захиргааны удирдлагын газрын дарга Б.Цогтбаатар, ДЭМБ-ын Монгол Улс дахь суурин төлөөлөгч Сергей Диордица болон албаны бусад хүмүүс оролцов.

Ноён Такеши Касай бүсийн захирлын хувиар Монголд хийж буй анхны айлчлал нь энэ бөгөөд тус уулзалтаар ДЭМБ-тай хамтран хэрэгжүүлэх үйл ажиллагаа, эрүүл хотын хүрээнд эрүүл иргэн аж төрөхөд тулгамдаж байгаа асуудал, хамтын ажиллагааг өргөжүүлэх чиглэлээр нийслэл болон эрүүл мэндийн салбарын удирдлагуудтай санал бодлоо солилцсон юм.

Үүний дараа Төрийн ордон руу хөдлөж, Монгол Улсын Ерөнхий Сайд У.Хүрэлсүх-д бараалхав. Монгол улсын Засгийн газрын төлөөлөгчид ДЭМБ-ын Номхон далайн баруун бүсийн хорооны чуулганаар дамжуулж Дэлхийн эрүүл мэндийн байгууллагын шийдвэр гаргах дээд түвшний механизм болох Дэлхийн эрүүл мэндийн ассамблейн үйл ажиллагаанд оролцох зэргээр тус байгууллагатай идэвхитэй хамтран ажиллаж ирсэнийг Ерөнхий сайд онцлон хэлэв.

Мөн энэ өдөр Салбарын Сайд Д.Сарангэрэл, Бүсийн Захирал ДР. Такеши Касайг хүлээн авч уулзсан юм. Сайд хэлэхдээ Монгол улсын Засгийн газар “өвдсөн хойно эмчлэх биш, өвчлөлөөс урьдчилан сэргийлэх” стратеги буюу нийгмийн эрүүл мэндийн тусламж үйлчилгээнд тулгуурласан эрүүл мэндийн тогтолцоог хөгжүүлэх зорилттой ажиллаж байгаа. Энэ ажлын хүрээнд үндэсний хэмжээнд халдварт болон халдварт өвчлөлийн эрт илрүүлэг, оношлогоонд иргэдээ бүрэн хамруулах, улмаар өвчилсөн иргэдийг эмчилгээнд хамруулах цогц үйл ажиллагааг үе шаттайгаар зохион байгуулж байна. Ялангуяа вируст гепатитын халдвар, сүрьеэ, бэлгийн замаар дамжих халдвар зэрэг халдварт өвчний шаардлагатай тусламж үйлчилгээг иргэд санхүүгийн онцгой хүндрэлгүйгээр авах нөхцөл бололцоог бүрдүүлэн ажиллаж байгаа гэлээ.

Мөн энэ өдөр ноён Др Такеши Касай Эрүүл мэндийн аюулгүй байдал хийгээд олон салбарын хамтын ажиллагааны өндөр түвшний хуралдаанд оролцсон бөгөөд уг хуралдааны хэлэлцүүлгийн гол сэдэв нь томуугийн цартахалын бэлэн байдлыг хангах тухай асуудал байлаа. Боловсрол, нийгмийн хамгаалал, төсөв санхүү, байгаль орчин, онцгой байдал зэрэг олон салбарын оролцоо, хамтын ажиллагааг хангах талаа Монгол улсын Засгийн газраас онцгой анхаарал хандуулж, ажилладаг болохыг онцолсон юм.

Дэлхийн эрүүл мэндийн байгууллагын Номхон далайн баруун бүсийн захирал Такаши Касайг Монгол Улсын Ерөнхийлөгч Х.Баттулга хүлээн авч уулзлаа
Такeши Касай Монгол Улсад анх удаагаа ирж байгаа тул Монгол Улсын Ерөнхийлөгч Х.Баттулга Монгол Улс-ДЭМБ-ын ирэх таван жилийн хамтын ажиллагааны бодлогын баримт бичигт тусгах шаардлагатай гэж үзсэн хүн ам дунд зонхилон тохиолдож буй өвчин, учир шалтгааны талаарх ерөнхий мэдээллийг өгөв.
Мөн энэ асуудалд цаашид анхаарал хандуулж ажиллахыг уулзалтад оролцсон Эрүүл мэндийн сайд Д.Сарангэрэлд даалгаж, Эрүүл мэндийн яамаар дамжуулан нягт хамтын ажиллагаатай байхыг ДЭМБ-ын төлөөлөгчдөөс хүсэв.

Шуурхай удирдлагын нэгжийн байранд орон нутаг дахь харъяа байгууллагууд ДЭМБ-ын Номхон далайн баруун бүсийн захирал Др Такеши Касайтай шууд холбогдон цахим хурал хийж,  нийгмийн ноцтой байдал, гамшгийн үед салбар хоорондын хамтын ажиллагаа хэрхэн явагддаг талаар санал бодлоо солилцлоо. Үүний дараа Томуугийн үндэсний төвийн үйл ажиллагаатай танилцсанаар өнөөдрийн ажил өндөрлөж байна. Маргааш ноён Такеши Касай Дундговь аймагт ажиллана.