Нийслэлийн мэргэжлийн хяналтын газарт энэ сарын 24-ны өдөр нэгэн иргэнээс “Тэс петролиум” ХХК-ийн ШТС шатахуун дутуу шахаж байна гэх гомдол иржээ.

Тодруулбал, иргэн иргэн н.Насантогтох Чингэлтэй дүүрэгт байрлах Шадивлан 41 салбараас банкаа дүүргэхэд 120 литрийн багтаамжтай банканд яг 120 литр шатахуун орсон байна. Гэтэл шатахуун хийхээс өмнө автомашины хянах самбар дээр 63 км явах шатахуун үлдсэн байна гэж зааж байсан учраас тухайн иргэн тус шатахуун түгээх станцыг бензин дутуу шахаж байна гэж үзээд Нийслэлийн мэргэжлийн хяналтын газарт гомдол гаргасан байна.

Гомдол мэдээлэл ирсний дагуу өчигдөр буюу энэ сарын 27-ны өдөр тус салбар дээр Нийслэлийн мэргэжлийн хяналтын газрынхан очиж шалгалт хийхэд дутуу шахдаггүй. Харин ч илүү шахдаг гэсэн дүн гарсан нь олон нийтийн сүлжээнд багагүй шүүмжлэл дагуулаад байна. 

Энэ талаар газар дээр нь ажилласан НМХГ-ын улсын байцаагчаас тодруулахад, "“Тэс петролиум” ХХК-ийн Шадивлан 41 салбарын шатахуун түгээж буй түгээгүүрийн улсын баталгаажуулалт, лац тэмдгийн бүрэн бүтэн байдлыг шалгахад, лацны бүрэн бүтэн байдал алдагдаагүй байсан. Мөн шатахуун түгээгүүрийн шахалтын хэмжээг магадлан тогтоох шалгалтыг хяналтын эталон мерникээр шалгахад зөрчилгүй байсан нөхцөл байдал тогтоогдсон" гэх мэдээллийг өгсөн юм.

Харин гомдол гаргасан иргэний хувьд "Мэргэжлийн хяналтын дүгнэлттэй санал нийлэхгүй байна. Тухайн өдөр 5-6 литр шатахуун дутуу шахсан нь баталгаатай. Учир нь миний банканд шатахуун хийхээс өмнө дор хаяж 5 литр шатахуун байсан. Гэтэл банкаа дүүргэхэд 120 литрийн багтаамжтай банканд яг 120 литр шатахуун орсон. Шатахуун хийхээс өмнө байсан 5 литр шатахуун хаачсан нь мэдэгдэхгүй алга болчихсон. Тиймээс яалт ч үгүй дутуу шахсан нь тодорхой" гэх тайлбарыг өгчээ. 

Т.Од

Zaluu.com