Турк-Монголын хамтарсан сургуулийн захирал, Турк улсын иргэн Вейсел Акчайг өнгөрсөн оны долдугаар сарын 27-ны өглөө гэрийнх нь гаднаас хулгайлсан хэрэг хэсэг шуугиан тарьж байснаа “хоёр орны найрамдалт харилцаанд сэв суулгах эвгүй юм болж болзошгүй” гэх далбаан дор дарагдаад өнгөрөв бололтой. Гэхдээ уг хэрэг нь нэлээд эртнээс бэлтэгдсэн, нарийн зохион байгуулалттай операци байсан нь нууц биш юм. Энэ хэрэгт манай эрх баригчид, ялангуяа тагнуулын ажилтнууд оролцсон гэх мэдээлэл олны сонорт хүрч байсныг зарим нь санаж байгаа байх.
Тухайн үед Туркийн өдөр тутмын томоохон сонин “Сабах”-ын тэргүүн нүүрэнд “Туркийн үндэсний тагнуулын газар Фетуллах Гюллений террорист сүлжээнд багтдаг сургуулиудын удирдлагыг баривчлах ээлжит ажиллагаагаа найман мянган километрийн цаана явууллаа. Вейсел Акчай нь Улаанбаатар дахь Турк сургуулийн захирал бөгөөд өнөөдөр түүнийг Монголын тагнуулын байгууллагын дэмжлэгтэйгээр баривчилжээ” хэмээн мэдээлсэн байлаа. Гэвч Туркийн тал тэр өдөр Вейсел Акчайг баривчилж, тусгай үүргийн нисэх онгоцоор нутаг буцаах гэж оролдсон үйлдлээ булзааруулан “Энэ хэрэг манайд хамаагүй” хэмээн мэдэгдэж байсан юм.
Вейсел Акчайг хулгайлсан хэргийг манай цагдаагийнхан шалгаж байгаа гэж байсан боловч төд удалгүй энэ асуудал бүхэлдээ таг чиг болсон нь үнэхээр сонин юм. Туркийн Ерөнхийлөгч Эрдоган энэ өндөр сэнтийд заларсаныхаа дараа 80-аад мянган хүнийг баривчилж, 170 гаруй мянган хүнийг ажлаас халсан гэдэг. Вейсел Акчай нь үнэхээр террорист байгууллагын гишүүн байсан эсэхийг бүү мэд. Ямартай ч манай улсын нутаг дэвсгэр дээр түүнийг хулгайлах ажиллагаа явагдаж эхлээд байтал азаар эхнэр нь олон нийтэд хандан эр нөхрөө тэрхүү Туркийн тусгай үүргийн онгоцонд ачуулалгүй манай хууль хяналтынхны мэдэлд үлдээж чадсан байв. Энэ үеэр харин нитлэлч Б.Батбаяр (Баабар) өөрийн твиттер хуудсандаа”Түрэгийн түрүүний элчин сайд намайг Элчин дээрээ урьж уулзаад түрэг сургуулийг хаах, захирлыг нь баривчлан шилжүүлэхэд туславал хувь хүний хувьд багагүй мөнгөөр урамшуулан шагнана гэж гуйж байлаа… Түүнийг хулгайлаагүй, бид хүлээлгэж өгч буй бололтой. Улс төрийн хэрэгтнийг баривчлан дарангуйлагчид нь хүлээлгэж өгдөг шившгийн орон болж хувирлаа л даа. Мөнгийг нь өгвөл ямар ч бузар юм хийхээс буцдаггүй шившгийн улс оронд бид тооцогдоно… Харсаар байтал манай оролцоот ажиллагаа. Султан Эрдоганы хаан ширээнд суух ёслолд Ерөнхийлөгчийн төлөөлөгч оролцсон нь ийм учиртай байж” хэмээн жиргэж байсан юм. Гэхдээ Монгол дахь Турк сургуулиуд террорист байгууллагаас санхүүжиж байсан гэх мэдээлэл ч бас бий.
Тэгвэл энэ оны зургаадугаар сарын 30-ны өдөр Монголд ажиллаж буй Туркийн арав гаруй багшийн визийн хугацаа дууссан байна. Тэд харин баривчлагдаж нутаг буцахаас болгоомжлоод сүүлийн өдрүүдэд Улаанбаатарын гудамжаар ганц нэгээрээ явахаа больжээ. Тэр бүү хэл Монгол дахь орон гэртээ ч хонож өнжиж чадахгүй айцгааж байгаа аж. Тиймээс хамт ажиллаж байсан Монгол багш нарыгаа гуйж, тэдэнтэй цуг бөөндөө нэг байранд чихэлдэж хонодог болсон байна. Тэд хүссэн ч, эс хүссэн ч Турк улсыг удахгүй зорьж таарна. Харин дарангуйлагч гэгдэж буй ерөнхийлөгч Эрдоган болон түүний албатууд тэднийг хэрхэн угтахыг таах аргагүй ажээ.
О.Баяр
Шуурхай.мн
