МАН-ын Ерөнхий нарийн бичгийн дарга Д.Амарбаясгалан НАМЗХ-ны Ерөнхийлөгч Г.Тэмүүлэн, Удирдах зөвлөлийн гишүүдэд Их хурлыг энэ сарын 8-нд хуралдуулах чиглэл өгчээ.
Чиглэлд “2020 оны шат, шатны сонгуулийн бэлтгэлийг хангахад намын 220 мянга гаруй гишүүдийн 30 хувийг хамарч байгаа залуучуудын оролцоог идэвхжүүлэн ажиллах зайлгшгүй шаардлага байна. НАМЗХ-ны дүрмийн дагуу дөрвөн жилд нэг удаа Их хурлаа хуралдуулах заалт өнөөдрийн байдлаар зөрчигдсөн буюу 2015 оны зургадугаар сарын 20-ны өдөр ээлжит V Их хурлаа хуралдуулсан нь 2019 оны зургадугаар сарын 20-ны өдрөөр дууссан тухай, мөн хугацаа алдалгүй VI Их хурлыг хуралдуулах тухай шаардах бичгийг 21 аймаг, 9 дүүргийн НАМЗХ-ны төлөөлөл Намын Удирдах Зөвлөлд ирүүллээ. Иймд НАМЗХ-ны Бага хурлыг 2019 оны долдугаар сарын 1-ны өдөр хуралдуулан ээлжит зохион байгуулах ажлын хэсгийг байгуулан Намын дүрэм, НАМЗХ-ны дүрмийг баримтлан 2019 оны долдугаар сарын 8-ны өдөр НАМЗХ-ны VI Их хурлыг хуралдуулахыг чиглэл болгож байна” гэжээ.
Энэ сарын 27-нд Нийгмийн ардчилал Монголын залуучуудын холбооны төлөөлөгчид МАН-ын Ерөнхий нарийн бичгийн дарга Д.Амарбаясгаланд шаардлага хүргүүлсэн. Тэд НАМЗХ-ны Их хурлыг долдугаар сарын 9-ны өдрөөс өмнө хуралдуулахыг шаардсан юм.
Их хурлаараа тус байгууллага Ерөнхийлөгчөө сольж ирэх дөрвөн жилийн бодлого, зорилтоо тодорхойлох аж. Одоо тус холбооны Ерөнхийлөгчөөр УИХ-ын гишүүн Г.Тэмүүлэн ажиллаж байгаа бөгөөд 2015 оны зургаадугаар сард сонгогдож дөрвөн жилийн хугацаа нь дуусч байгаа аж. Түүнээс өмнө одоогийн ЗГХЭГ-ын дарга Л.Оюун-Эрдэнэ ажиллаж байсан юм. Гэхдээ Л.Оюун-Эрдэнэ нь гадаадад сургуульд суралцахтай холбоотойгоор түүний ажлыг УИХ-ын гишүүн Н.Номтойбаяр орлож байсан билээ.
