Аварга тулыг бариад, эргүүлэн усанд тавьдаг нь загасчдын хобби бас хорхойгоо дарж буй байдал. Гэтэл манай хууль, шүүхийнхэн яг загасчид шиг болоо юу гэлтэй байдаг болж. “Томхон тул” барилаа, хорилоо, саатууллаа. Энэ нь тэгээд сүртэй гэж жигтэйхэн. Харамсалтай нь хуулийн хугацаа эсвэл шүүхээс, өмгөөлөгчийн хүэсэлтээр батлан даалтаар гарсан гээд... За ер нь тэгсхийгээд эрх чөлөөтэй, салхи татуулан давхина даа, нөгөө “тулууд” нь.
Дээрхийн адил үлгэр өнгөрсөн нэгдүгээр сарын 7-нд болсон байдаг. Тодруулбал, Улсын ерөнхий прокурор асан Д.Дорлигжавыг, төрсөн дүү Д.Баатартай нь хамт баривчлан , цагдан хорьж, "Алтандорнод Монгол" компанийн захирал Т.Ганболдоос их хэмжээний авилга авсан гэж үзэн, гэрт нь хүртэл нэгжлэг хийсэн.
"Алтандорнод Монгол"-ын гэгддэг Т.Ганболд Улсын ерөнхий прокурор асан Д.Дорлигжавт дөрвөн сая доллар өгсөн гэж хоёр ч удаа телевизээр ярьсан. Түүний мөрөөр АТГ-ын ажиллагаа явуулсан. Тэдний дунд 4 сая ам.долларыг өгөлцөж, авалцсан. Бас аваагүй, нэхээгүй, дансанд ороогүй, гараагүй гэдэг асуудал үүссэн.
Товчхондоо нэг нь их хэмжээний авлига өгсөн гэдэг. Нөгөө нь аваагүй гэдэг. Ингэж байсаар 2019 оны хоёрдугаар сарын 1-нд Нийслэлийн прокурорын газраас Д.Дорлигжав нарыг үргэжлүүлэн цагдан хорих саналыг шүүхэд хүргүүлсэн ч Хан-Уул дүүргийн Эрүүгийн хэргийн анхан шатны шүүхээс тэднийг батлан даалтад гаргах шийдвэр гаргасан байдаг. Ингээд л энэ хэргийн сураг алдарч эхэлсэн.
Гуравдугаар сард Д.Дорлигжавын өмгөөлөгч Д.Пүрэвбаатар хэвлэлд хэрэг дуусах шатандаа орж байгаа хэмээн тайлбарласан. Түүнээс хойш дахиад гурван сарын хугацаа өнгөрсөн ч өндөр албан тушаалтан их хэмжээний авлигын хэргийн сэжигтэн болсон “түүх” хумхын тоос болсон мэт таг. Хэрвээ хэрэг нэг тийш шийдэгдсэн бол Ерөнхий прокурор асан Д.Дорлигжав буруугүй бол нэр төрөө сэргээлгэх гэж нэлээд асуудал тарих нь тодорхой. Түүгээр ч зогсохгүй “Алтандорнод Монгол”-ын захирал Т.Ганболд бусдыг гүтгэсэн ялд унана. Дээрх таамаглалуудыг хичнээн дэвшүүлээд ч цаг хугацааны хувьд бүтэн зургаан сар өнгөрчихсөн болохоор хэн нэгний сэйфэнд хэвтэж байж таарах нь. Гэхдээ дараагийн барьц нь юуны төлөө, хэний өгөөш байх бол...
Эх сурвалж: Erennews.mn
