Одоогоос жил гаруйн өмнө буюу 2018 оны нэгдүгээр сард ХЗДХ-ийн сайд Ц.Нямдоржийг 360 сая төгрөгийн үнэтэй 2018 оны лексус 570 автомашин унаад тансаглалаа хэмээх шүүмжлэл өндрөө авсан юм. Тухайн үед сайд “Саяхан манай яамныхан хуучин машинуудыг зохицуулалт хийж, шинэ машин авсан нь үнэн шүү. 0101 УБҮ улсын дугаартай “Лексус 570” машиныг би унадаг нь үнэн” хэмээн тайлбарласнаар асуудал намжиж байв. Тэгвэл энэ удаад тус машины дуулиан дахин дэгдэж эхлээд байна. Тодруулбал, Ц.Нямдорж сайдын хөлөглөж байсан 360 сая төгрөгийн үнэтэй “Лексус 570” маркийн автомашин нь дипломат хар тамхины сүлжээгээр орж ирсэн гэх мэдээлэл баримт сэлттэйгээ цацагдаад байгаа юм.
-360 САЯЫН ҮНЭТЭЙ “ЛЕКСУС 570” МАШИН ХЭРХЭН Ц.НЯМДОРЖ САЙДЫНХ БОЛЖ БАЙВ-
Ц.Нямдорж сайдын унаж байсан “Lexus 570” маркийн автомашиныг ОХУ-аас Түдгэний Мөнхбат гэх хүн 2017 оны арваннэгдүгээр сарын 24-ны өдөр “Лотус Голд Майнинг” ХХК-ийн нэрээр худалдан авч Монголд оруулж иржээ. Ингэхдээ хоёр улсын хил гаалиар дипломат хөнгөлөлттэйгээр хөлөөр нь оруулж ирсэн байдаг аж.
Монголд оруулж ирээд улмаар “ШШГЕГ-ын албан хэрэгцээнд туулах чадвар сайтай машин нийлүүлэх тухай” хоёр талын гэрээ байгуулж, 360 сая төгрөгөөр худалдсан байна. Ингээд 2018 оны цоо шинэ загварын Lexus 570 автомашин гялгар ууттайгаа Ц.Нямдорж сайдын гар дээр очиж байжээ.
Тэгвэл Т.Мөнхбат гэх хүн Ц.Нямдорж болон түүний хүү Н.Анхбаяртай ямар холбоотой вэ. Үүнийг тодруулбал, Ц.Нямдоржийн хүү Н.Анхбаяр нь Гадаад Харилцааны Яамны Төрийн Захиргаа, Удирдлагын Газрын даргаар ажиллаж байгаад 2019 оны дөрөвдүгээр сараас Монгол Улсаас Австри улсад суух онц бөгөөд бүрэн эрхт элчин сайдаар томилогдсон.
Тэрээр Гадаад Харилцааны Яамны Төрийн Захиргаа, Удирдлагын Газрын даргаар ажиллаж байхдаа Түдгэний Мөнхбатыг 2017 оны аравдугаар сарын 11-нд Улаан-Үд хот дахь Ерөнхий консулын газрын худалааны төлөөлөгчөөр томилуулжээ.
Ийнхүү Т.Мөнхбат нь худалдааны зөвлөхөөр томилогдсоноосоо сарын дараа буюу дээр өгүүлсэнчлэн 2017 оны арваннэгдүгээр сарын 24-ны өдөр “Лексус 570” автомашиныг ОХУ-аас худалдан авч байж.
-Т.МӨНХБАТ “ЛЕКСУС 570” АВТОМАШИНЫГ ОРУУЛЖ ИРЭХИЙН ТУЛД ГААЛЬ ДЭЭР “ДИПЛОМАТ ХӨНГӨЛӨЛТ” ЭДЭЛЖЭЭ-
Тэрээр Ц.Нямдорж сайдын автомашиныг Монголд оруулж ирэхийн тулд хил гааль дээр дипломат хөнгөлөлт эдэлжээ. “Мэдэгдэл: ОХУ-ын Улаан-Үд хот дахь Монгол Улсын Ерөнхий консулын газрын Худалдаа, эдийн засгийн асуудал эрхэлсэн атташе Түдэнгийн Мөнхбатад холбогдох автомашиныг ОХУ-аас гадагш экспортлоход гаалийн бүрдүүлэлт хийх хүсэлт гаргасан. Уг машиныг Буриад улсын Кяхта шалган нэвтрүүлэх боомтоор дамжуулан ОХУ-аас гарган Монгол руу тээвэрлэх болно” гэжээ.
ОХУ-аас Монгол улс руу автомашин нэвтрүүлэх мэдэгдэл
-ОХУ-ААС Ц.НЯМДОРЖ САЙДАД АВТОМАШИН ОРУУЛЖ ИРЖ ӨГСӨН Т.МӨНХБАТ ХАР ТАМХИ ЗӨӨВӨРЛӨСӨН ХЭРГЭЭР ГЕРМАНД ХОРИГДОЖ БАЙНА-
Өнгөрөгч зургадугаар сард манай хэвлэл мэдээллийн хэрэгслүүдээр “Турк улсын Станбул хот дахь Консулын газрын дэд консул Б.Баттүшиг, түүний жолооч С.Эрдэнэбаяр нар 70 кг геройн буюу хар тамхи тээвэрлэж яваад ХБНГУ-ын хил дээр саатуулагдсан тухай мэдээлэгдэж багагүй шуугиан дэгдээсэн. Гэтэл уг хэргийн араас ГХЯ-ны нуун дарж байсан бас нэг хэрэг олон нийтэд ил болсон билээ.
Тодруулбал, 2018 оны арванхоёрдугаар сарын 17-нд Улаан-Үдийн Ерөнхий консулын газарт худалдааны атташегаар ажиллаж байсан Түдгэний Мөнхбат түүний жолооч болох Эрдэнэбаатарын Оргил гэх хоёр хүн Чех улсаас ХБНГУ руу орох гэж яваад хил дээр саатуулагдсан байдаг. Хууль хяналтынхан тэдний унаж явсан дипломат дугаартай /089D93 77/ машинаас мансууруулах үйлчилгээтэй их хэмжээний эм, эмийн бэлдмэл олсон байдаг. Одоо энэ хоёр эрхэм Германы Дрездэн, Гөрлитз хотын шоронд тус тусдаа хоригдож байгаа юм.
Шүүх хурлын урьдчилсан хэлэлцүүлэг нь өнгөрөгч долоо хоногт болсон. Энэ долоо хоногт үргэлжлэх юм. Тэднийг ХБНГУ руу эм, эмийн бэлдмэл (600 мянган еврогийн үнэтэй 150 мянган ширхэг мансууруулах эм, эмийн бэлдмэл) хууль бусаар оруулахыг завдсан, бичиг баримт хуурамчаар үйлдсэн хэрэгт буруутгаж байгаа билээ. Ийнхүү Ц.Нямдорж сайдын “Лексус 570” автомашиныг ОХУ-аас оруулж ирсэн Т.Мөнхбатыг "Монгол Улсын дипломат албанд ямар ч хамааралгүй хүн” хэмээн Монгол Улсын ГХЯ-наас Германы Гадаад хэргийн яаманд мэдэгдсэн байна.
,Эх сурвалж: isee.mn
