БСШУСЯ-ны захиалгаар ПИ ЭМ ХХК гүйцэтгэж, БАРИЛГЫН ХӨГЖЛИЙН ТӨВӨӨС захиалагчийн техник хяналтыг гүйцэтгэсэн БГД-ийн 18-р хороонд байрлах “Шинэ эхлэл” олон улсын лаборатори сургууль нь өргөтгөлийн барилга буюу шалгалт авах стандартын заалтай болж, барилгын ажилд улсын комисс ажиллан, өнөөдрөөс эхлэн байнгын ашиглалтад орууллаа.

Монгол Улс 2011 онд Кембриджийн шалгалтын төвтэй хамтран ажиллах эхлэлээ тавьж, олон улсын Кембриджийн хөтөлбөрийг хэрэгжүүлэхээр төрийн өмчийн гурван сургуулийг байгуулсаны нэг нь “Шинэ эхлэл” сургууль юм.

Тус сургууль 2011 онд байгуулагдсан цагаасаа эхлэн Кембриджийн хөтөлбөрийг хэрэгжүүлж байгаа бөгөөд энэхүү олон улсын хөтөлбөрийг хэрэгжүүлэхэд тодорхой стандарт, шаардлагуудыг тавьдаг байна.

Тухайлбал, жилд хоёр удаа олон улсын шалгалтыг өөрийн байрандаа зохион байгуулах ёстой. Шалгалт явуулах байр нь ч мөн стандарттай бөгөөд Шинэ эхлэл сургуулийн хувьд зай талбай багатай учир ижил хөтөлбөр хэрэгжүүлэгч “Шинэ эрин” сургуулийн зааланд шалгалтаа авдаг байсан ажээ.

Тиймээс энэ жил БСШУСЯ-нд хүсэлт гаргаж, барилгаа дээш өргөтгөн, шалгалтын заалтай болж байгаа бөгөөд шинэ хичээлийн жил эхлэхээс өмнө барилгын ажлыг дуусган байнгын ашиглалтад оруулж, 9-р сарын 1-нээс эхлэн сурагчид анги танхимуудыг ашиглах боломж бүрдлээ.

Өргөтгөн барьсан танхим нь 360 м2 талбайтай, хяналтын есөн камер, өндөр тааз, агааржуулалтын систем, гэрэлтүүлэг сайтай болж байгаагаараа онцлогтой. 
Мөн хоёр анги, номын сан, шалгалтын материал хадгалах архивын өрөө, ариун цэврийн өрөөтэй. Өргөтгөлийн нийт талбай нь 480 м.кв ажээ.

Барилгын ажлын захиалагчийн техник хяналтыг Барилгын хөгжлийн төвийн хяналтын инженер Б.Баярмаа хариуцан ажилласан байна.