Өвлийн цагт томуу, томуу төст өвчний дэгдэлт ихэсдэг энэ үед хүүхдийн эмнэлгийн ачаалал эрс нэмэгддэг. Энэ хэрээр тасалгааны нарийн тоосонцрын хэмжээ ихэсдэг. Агаарын бохирдол дээд цэгтээ хүрч байгаа энэ үед эмнэлгийн тасалгааны агаар цэвэр байх ёстой. Хамгийн их хүн амтай Сонгинохайрхан дүүргийн Засаг дарга Ж.Сандагсүрэн хүүхдийн нэгдсэн эмнэлэгтээ шат дараалсан үйл ажиллагааг хэрэгжүүлж гадна агаарыг шүүж цэвэршүүлэх, дотор агаарыг гадагшлуулах төхөөрөмжүүд суурилуулжээ. Уг төхөөрөмжийг ажиллуулснаар нарийн тоосонцрын хэмжээ 500-гаас 105 болтлоо буурч байгааг судалгаагаар тогтоожээ. Тасалгааны агаарын чийгшил, нарийн тоосонцрын хэмжээг иргэд гар утсан дээрээсээ хянах боломжтой гэдгийг дүүргийн удирдлагууд онцолж байна. Нийт 13 төхөөрөмжөөс гадна хэвтэн эмчлүүлэх өрөө бүрд тасалгааны агааржуулагч байрлуулсан байна.
Их ачааллын үед орны хүрэлцээ муугаас хүүхдүүд газар хэвтэн эмчлүүлэх тохиолдол гардаг. Тэгвэл энэ жил нэг ч хүүхэд газар хэвтүүлэн эмчлүүлэхгүй байх нөхцөлийг хангаж сургалтын танхим болон бусад нэмэлт өрөөнүүдийг тохижуулан ажиллаж байна. Тус эмнэлэгт одоогийн байдлаар хоногт дунджаар 200 орчим хүүхэд хэвтэн эмчлүүлж байгаа юм. 
Шуурхай.мн
