“Home plaza”компанийн хөрөнгө оруулагч М.Энх-Амгалан:
HOME PLAZA Ц.САНДУЙД ОГТ ХАМААГҮЙ.
Өнгөрсөн Даваа гарагийн орой үзэгчдийн хүртээл болсон “Цензургүй яриа” нэвтрүүлгээр НИТХ-ын төлөөлөгч Ц.Сандуй оролцсон нь нэлээдгүй шуугиан тариад байгаа билээ. Тэр өөрийн хэлсэн бүгдийг баримтжуулан үзүүлж мөн олны хэл амны бай болоод байгаа “Home plaza” барилга өөрт нь огт хамаагүй гэж мэдэгдсэн тул бид “Home plaza” компанийн хөрөнгө оруулагч М.Энх-Амгалантай уулзаж, тодруулга авсан юм.
- Танд энэ өдрийн мэнд хүргэе. Даваа гарагийн “Цензургүй яриа” нэвтрүүлгээр НИТХ-ын төлөөлөгч Ц.Сандуй орсон. Мэдээж та тэр нэвтрүүлгийг үзсэн байх?
- Би БНЭУ-д болсон Ерөнхийлөгч Х.Баттулгын айлчлалд Худалдаа Аж Үйлдвэрийн танхимын Бизнес группийн гишүүнээр оролцоод өчигдөр ирлээ. “Цензургүй яриа” нэвтрүүлгийн зочноор Ц.Сандуй оролцож “Home plaza”-ын талаар ярьсан байна. Удаа дараа “Home plaza” шүүмжлэлд өртөж байгаа бөгөөд замын түгжрэлтэй холбоотой л ийм асуудал гардаг гэж ойлгодог байлаа. Гэтэл үүнийг Ц.Сандуйтай холбож яариад байгаа учраас тайлбарлах нь зүйтэй юм байна. Ц.Сандуй бид хоёр эртнээс найзууд. Гэхдээ Home plaza Ц.Сандуйтай ямарч холбоо байхгүй. Сүүлийн үед сошиал болон хэвлэл мэдээллийн хэрэгслэлээр Home plaza барилгыг Сандуйтай холбон ташаа мэдээлэл ихээр цацагдаж нэр төрд нь халдаж байгаад маш их харамсаж байна . Би анх Home plaza компанийг БНСУын хамтарсан хөрөнгө оруулалттайгаар байгуулсан бөгөөд хувьцааг нь худалдан авч 100% Монголын хөрөнгө оруулалттай компани болсон. Эзэмшигчээр нь би болоод манай хоёр дүү байдаг. Энэ тал дээр “Цензургүй яриа” нэвтрүүлэг дээр тодорхой ярьсан байна лээ.
- Танайхаас болж зам түгжирч байна гэсэн ард иргэдийн бухимдал их байна. Энэ тал дээр та юу хэлэх вэ
- Бид “Home plaza” 2 салбараа 2012 оны 12 сард нээсэн ба олон хүнийг ажлын байраар хангаж улсдаа татвараа төлж улсын төсвийг бүрдүүлж байгаа жирийн компаниудын нэг. Хот хөгжихийн хэрээр орон сууц барилгажилт их явагдаж зам ачааллаа даахаа больсон. Улаанбаатар хотод ганцхан Home plaza дээр түгжрээд байгаа юм биш. Хот тэр чигээрээ л түгжрээтэй байна.
- Бизнес эрхлэгчдээ зөв талаас нь харах хэрэгтэй. Улс орны эдийн засгийг авч явдаг, төсвийг бүрдүүлдэг хүмүүс бол бизнес эрхлэгчид. Төр, ард түмэн зөвөөр харах хэрэгтэй. Буруу мэдээлэлтэй яваад байж байж болмооргүй байна.
- Саяхан “Home plaza” орчмын газрыг нураан, зам тавьж байна гэсэн мэдээлэл нэлээн шуугиан тарьсан?
- Шинэ гүүр болон замын өргөтгөлийн ажилтай холбогдуулан бид нийслэлийн авто замын газар болон хотын захиргаатай удаа дараа зөвшилцөн дэмжиж ажиллахаа мэдэгдэж байсан бөгөөд саад тотгор болж байсан зүйлгүй. Иймээс ч замын ажил үргэлжлэн явагдаж манайх зүүн болон хойноосоо газар чөлөөлж өгч байгаа. Одоо шинэ гүүр нээгдээд бүрэн ашиглалтанд ороогүй байна. Сүүлийн үеийн мэдээгээр буцаж эргэх асуудлыг гүүрэн доогуур гаргаад чиглэлийг нь өөрчлөөд бүрэн ашиглалтанд оруулвал замын ачаалал багасах тухай ярьж байна.
- Анх танайхыг нээгдэж байхад үнэхээр сайхан санагдаж байлаа. Харамсалтай л юм?
- Бид 8000 м/кв эзэмшил газар дээрээ 1700 м/кв барилга барьж үлдсэн талбайд орчин үеийн үйлчилгээний стандардын шаардлага хангасан ногоон байгууламж, зам талбай, машины зогсоол байгуулсан. Тус барилга нь 2015 оны Улаанбаатар хотын Шилдэг тохижилттой барилга гэдэг шагнал авч байсан. Манайх Монголд үйлчлүүлэгчийн тав тухыг хангасан сүүлийн үеийн тоног төхөөрөмжөөр тоноглогдсон орчин үеийн супермаркетыг анх нээж байснаараа бахархдаг.
- Та Ц.Сандуй бид хоёр эртнээс найзалсан гэлээ? Түүнийг хэр сайн мэдэх вэ?
- Миний хувьд Сандуй бол сайн найз. Үнэхээр чадалтай боловсон хүчин гэж боддог. Өөрийнхөө бүх сэтгэл зүрхээ намынхаа төлөө зориулж ар гэрийнхээ амьдралыг мартах нь холгүй зүтгэж байсныг манай найз нөхөд бүгд л мэднэ дээ.
Shuurhai.mn
