Авто тээврийн үндэсний төв өнгөрсөн долдугаар сарын 24-нд УАА серийн дугаарыг шинээр гаргасан. Энэхүү серийн дугаар нь хоёрхон сарын дотор зарагдаж дуусчээ. Тодруулбал, Улаанбаатар хот болон орон нутагт УАА сертэй 9890 дугаар олгогдсон байна.
Тиймээс УАЕ серийн дугаарыг шинээр гаргажээ. Шинээр гарч буй серийн дугааруудыг зөвхөн импортоор орж ирсэн шинэ машинуудад олгож байгаа бөгөөд машиных нь арлын дугаарыг бүртгэн олгож байгаа юм.
Гэвч азын гэж нэрлэгддэг чамин дугаарыг дамлан зарах болжээ. Санамсаргүй байдлаар сонгон олгохоор программчилсан дугаар олголтын цахим бүртгэлээс азын дугаарыг хэрхэн авч дамлан зарж байгаа асуудлыг цагдаагийн байгууллага шалгаж байгаа юм байна. Үүнтэй холбогдуулан Авто тээврийн үндэсний төвөөс өндөр үнээр азын дугаар худалдан авч залилангийн гэмт хэрэгт оролцохгүй байхыг анхаарууллаа.
Авто тээврийн үндэсний төв бүх дугаараа азын, алт, мөнгөн гэж ялгахгүйгээр санамсаргүй байдлаар олгогдох программынхаа дагуу 7600 төгрөгийн хураамж авч олгож байна.
