Монголын үндэсний бөхийн холбоог шүүмжилж, улсын арслан Н.Батсуурь сошиал ертөнцөд дуу хоолойгоо илэрхийлсэн нь олон хүний анхаарлыг татаж байна. Залуу арслан чухам юунд бухимдаж, сэтгэгдлээ хуваалцсаныг хүргэе.

Бөхчүүд бид бодож явдаг зүйлээ хэлэх гэсэн юм. Үндэсний бөхийн өнөөгийн түвшин үнэхээр өрсөлдөөнтэй болсон энэ цагт бөхчүүд хоорондоо муудалцах талцах зүйл огтхон ч байхгүй билээ. Тэр аймаг энэ тэр гэж юунаас болж энэ маргаан үүсч байгаа вэ гэхээр өнөөдрийн бөхийн холбоо маань шударга бус шүүснээс болж нутаг усаараа талцах явдал их боллоо. Тэр жилийн наадмаар П.Бүрэнтөгс, Р.Пүрэвдагва, ноднин жил Ч.Санжаадамба, Г.Ганжад нарын барилдаанд хэн хэнд нь ч буруу байхгүй. Жилд ганц болдог улсын баяр наадмаараа цолоо ахиулах зорилготой залуусыг шударга шүүхэд л бөхийн холбоо маань ажиллах хэрэгтэй байна. Мөн энэ жил аймгийн харцага Н.Хүрэлсүх маань аймагтаа барилдаж түрүүлсэн цолыг нь хүчингүйд тооцож байна.

Мэдээж албан бичиг өгсөөр байхад тойргийн цолоор нь барилдууллаа гэж Монголын үндэсний бөхийн холбоо, аймгийн бөхийн холбоо хоёрын дунд бөхчүүд хохироод байна. Бөхчүүдийнхээ эсрэг биш эрх ашгийн төлөө бөхийн холбоо маань ажиллавал ийм зүйл болохгүй. Бөх хүний амжилт, цаг хугацаа хязгаартай, богино жил байдаг юм. Ийм шийдвэрээр болж ард түмнээ баясгаж монгол эр хүний дүр төрх, уламжлалаа хадгалж явж байгаа бөхчүүдэд маань зөв менежменттэй зөв удирдаад явбал хоёр тал болох зүйл байхгүй.