Шинэ оны өмнө “Тэс Петролиум” компанийн ШТС-ууд АИ-92 автобензин болон дизель түлшний жижиглэнгийн борлуулалтыг “30000 төгрөгөөс дээш үнийн дүнгээр хийхгүй” гэж хязгаар тогтоосон бол “Магнай трейд”, “Сод Монгол” зэрэг компаниуд 100000 төгрөгөөс дээш үнийн дүнгээр борлуулалт хийхгүй гэсэн хязгаарлалт хийсэн байдаг. Үүнийг шатахууны үнийг зохиомлоор өсгөх гэсэн оролдлого гэж олон нийтийн зүгээс үзэн шатахуун импортлогч аж ахуйн нэгжүүдийг шалгахыг шаардаж эхэлсэн билээ.
Нефть бүтээгдэхүүн нь өргөн хэрэглээний бараа бүтээгдэхүүний суурь үнэд шууд нөлөөлдөг учир шатахууны үнийг нэмэх, борлуулалтад хязгаарлалт хийх эсэхийг Шатахууны үнийн зөвлөл хуралдаж байж шийддэг.
Өнөөдөр уг зөвлөл хуралдаж нефть импортлогч ААН-үүдийг шалгаж, бодит үнийн судалгааг хийх шийдвэрийг гаргасан байна. Энэ талаар Зам, тээврийн хөгжлийн дэд сайд Б.Цогтгэрэл цахим хуудсаараа дамжуулан мэдээлэлжээ.
Г.Дугар
