Монгол Улс олон улсад хүлээн зөвшөөрөгдсөн автомашины дугаарын шинэчлэл хийхээр төлөвлөж буй. Энэ талаар “Автотээврийн үндэсний төв” ТӨҮГ-ын дэд захирал Х.Баярхүүгээс тодрууллаа.
-Тээврийн хэрэгслийн улсын бүртгэлийн серийн дугаарт өөрчлөлт оруулахаар болсон байна. Яагаад өөрчлөхөөр болсон юм бэ?
-Тээврийн хэрэгслийн улсын дугаарыг олон улсын жишигт нийцүүлэхээр болсон. Учир нь, НҮБ-аас гаргасан конвенцид нэгдэн орсноор зайлшгүй шинэчлэх шаардлагатай болсон юм. Автомашины дугааржуулалтыг үсэг, тэмдэглэгээ буюу тоо үсгийг олон улсын стандартад нийцүүлэх зорилгоор MNS 44102002 гэсэн стандартын дагуу ажиллаж байна. Үүнээс гадна холбогдох журам, программд өөрчлөлт оруулж шинэчилж байгаа. Гэхдээ одоогийн байдлаар Зам, тээврийн хөгжлийн яамнаас бүртгэлийн журам хараахан гараагүй. Ерөнхийдөө бэлтгэл ажил хангагдаад явж байна.
-Хэзээнээс мөрдөгдөж эхлэх вэ?
-Энэ оны долдугаар сарын 1-нээс эхлэн мөрдөгдөж эхэлнэ. Стандарт маань өнгөрсөн онд батлагдсан. Одоо журмаа батлах болон бусад бэлтгэл ажил үлдсэн.
Дугаар шинэчлэхэд иргэдээс нэмэлт хураамж, төлбөр авахгүй
-Тээврийн хэрэгслийн дугаарын шинэчлэлд нийт хэчнээн төгрөг зарцуулж байгаа вэ?
-Дугаарын шинэчлэлд ямар ч хөрөнгө мөнгө зарцуулахгүй.
-Дугаарын хэмжээ, загвар гээд бүхэлд нь өөрчлөлт орж байгаа юу?
-Манайх одоо 25 үсэгтэй крилл үсгээр явж байгаа. Тухайлбал, УБЯ, УБН гэх мэт дугаарын тэмдэглэгээг хэрэглэдэг. Гэвч хил даваад явахаар зарим нэг үсгийг ОХУ- аас өөр таньдаг улс байдаггүй. Жишээлбэл “Ж” үсэг байлаа гэхэд ганцхан оросууд л мэддэг. Тэгвэл тээврийн хэрэгслийн дугаарын шинэчлэлээр хуучин хэрэглэгдэж байсан дугаарын үсгийг 11 латин үсгийн тэмдэгтэд багтаан өөрчлөх юм. Түүнээс биш дугаарын хэмжээ, өнгө будгийн хувьд өөрчлөлт орохгүй. Нэг машин нэг л дугаартай байна. Дугаарыг бол солихгүй. Манайхаас лацдана. Тиймээс хэрэв тээврийн хэрэгслээ худалдахаар болбол дугаартай нь өгнө гэсэн үг. Нэг үгээр иргэд олон улсад зорчиход тулгардаг байсан бэрхшээлийг хөнгөлж буй хэрэг юм.
-Тээврийн хэрэгслийнхээ дугаарыг солиход иргэд ямар нэг төлбөр, хураамж төлөх үү?
-Иргэд ямар нэгэн нэмэлт төлбөр төлөх шаардлагагүй. Урьдын адил тээврийн хэрэгслийн дугаар авдаг байсан, тэр журмынхаа дагуу авна.
-Шинээр импортоор оруулж ирж байгаа тээврийн хэрэгсэлд шууд хамааралтай юу?
-Тэгэлгүй яахав. Тэгэхдээ ирэх долдугаар сарын 1-нээс хэрэгжиж эхлэх учраас заасан хугацаанаас хойш импортоор орж ирсэн тээврийн хэрэгсэл худалдаж авах юм бол заавал шинэ стандартын дагуу дугаар авах шаардлагатай.
-Нийт тээврийн хэрэгслийг хэзээ хамруулж дуусах вэ?
-Албан шаардлагаар дугаарын шинэчлэл хийхгүй. Иргэд өөрсдийн хүсэлтээр солиулна. Хэрвээ иргэд тээврийн хэрэгслээр олон улсад байнга зорчдог бол шинэ дугаараар солиулах хэрэгтэй. Ерөнхийдөө шинэчлэлийг аажмаар хийнэ гэсэн үг.
-Дугаар солиход машины овор хэмжээ болон марк хамаарах уу?
-Маркийн хувьд ямар ч ялгаа байхгүй. Харин хүнд даацын тээврийн хэрэгслийн стандартад заасан технологийн дугаар гэж бий. Үүгээр ялгарахаас биш дугаарын шинэчлэлд ямар нэг ялгаа гарахгүй.
Г.Оюунтөгс
Засгийн газрын мэдээ
