Баянхонгор аймгийн Баян-Овоо сумын уугуул Мөнхбатын Уранцэцэг. Хонгор нутгаас олон шилдэг тамирчид төрөн гардагийн нэгэн баталгаа нь Урнаа. Самбо, жүдо бөхөөр хичээлэн Монгол хэмээх нэрийг бөмбөрцөгийн дэвжээнд олонтаа дуурсгаж яваа хүчтэн. Монголын жүдогийн түүхэнд эмэгтэй тамирчдын анхны алт, дэлхийн аваргын хоёр дахь медалийг энгэртээ гялалзуулсан ачтан. Мөн Самбо бөхийн дэлхийн хоёр удаагийн аварга, кураш бөхийн дэлхийн аварга. Түүнийг дагаж Их спортоор хичээллэж эхэлсэн хүүхэд багачуул олон байдаг билээ. Тэрбээр энэ онд мөн л бахдам амжилт гарган Эх орныхоо нэрийг өндөрт өргөж чадлаа.
Жүдо бөхийн энэ оны насанд хүрэгчдийн Дэлхийн аварга шалгаруулах тэмцээн Японы нийслэл Токио хотод зохион байгуулагдсан билээ . Манай улсаас 18 тамирчны бүрэлдхүүнтэйгээр Их Наран улсыг зорисон билээ. Тэмцээний эхний өдөр Монголын тамирчдаас Монгол улсын гавьяат тамирчин Мөнхбатын Уранцэцэг 48 кг-ийн жинд хүрэл медаль хүртэж баг тамирчдынхаа гарааг амжилттай эхлүүлсэн юм.
Түүний жинд дэлхийн шилдэг 45 бөх зодоглосон бөгөөд М.Уранцэцэг эхний тойрогт гоц мөргөж, хоёрдугаар тойрогт Тайванийн бөхийг нэг минут, 25 секундэд, гуравдугаар тойрогт Румыны бөхийг 53 секундэд цэвэр ялж, хэсгийн аваргын төлөө 2018 оны ДАШТ-ий хүрэл медальт Казахстаны бөх Г.Отгонцэцэгийг нэг минут, дөрвөн секундэд цэвэр ялснаар хагас шигшээд шалгарсан юм.
Хагас шигшээ барилдаанд өнгөрсөн оны дэлхийн аварга, Украйны залуу тамирчин Дарья Билодидад даралтаар цэвэр ялагдсан Улмаар хүрэл медалийн төлөө Францын бөх Мелани Клеменийг даралтаар цэвэр ялснаар ДАШТ-ээс гурав дахь медалиа хүртлээ. Урнаа маань ДАШТ-ээс 2013 онд алт, 2017 онд мөнгөн медаль хүртэж байсан бөгөөд ийнхүү Дэлхийн аваргын иж бүрдэл медальтай болон Монголын багийнхаа нэр төрийг хамгаалж чадсан билээ. Мөн Монголын жүдочдоос Дэлхийн аваргын иж бүрдэл едальтай анхны, 3 медальтай хоёрдахь тамирчин боллоо. Эх орныхоо жүдогийн нүүр царайг нэгэн арванд тахалж яваа түүнд одоо Олимпийн медаль л үлдээд байна. Дараа жил Токио хотноо болох хүн төрөлхтөний спортын Аугаа их баяр наадмаас санасан гүйцээж, Алтан соёмбот далбаагаа мандуулж, Ариун төрийн дууллаа эгшиглүүлээрэй.
Шуурхай.мн
