Шинжлэх ухааны ажилтны улсын анхдугаар их хурлын “Шинжлэх ухаан, технологи ба түншлэл” IV салбар хуралдаан СУИС-ийн оюутан театрт амжилттай болж өндөрлөв. Уг салбар хуралдааны хүрээнд “Шинжлэх ухаан ба төр” “Шинжлэх ухаан ба аж үйлдвэр (инноваци)” “Шинжлэх ухааны байгууллага хоорондын түншлэл” сэдвүүдээр хэлэлцүүлэг өрнүүлж шинжлэх ухааны өнөө хийгээд хэтийн хөгжлийн талаар салбарын эрдэмтэн судлаачид нэгэн зорилгын дор үзэл бодлоо уралдууллаа.
IV салбар хуралдааны төлөөлөгчид шинжлэх ухааны байгууллагуудын хамтын ажиллагаа түншлэл шинжлэх ухааныг хөгжүүлэхэд ямар үүрэг гүйцэтгэх, цаашид хэрхэн хамтран ажиллах талаар идэвхтэй ярилцаж хэлэлцсэн юм. Инновацид суурилсан эрдэм шинжилгээний төсөл хөтөлбөрүүд хамтран хэрэгжүүлэх, гарааны компаниудыг хөгжүүлэхэд шинжлэх ухааны байгууллага хоорондын хамтын ажиллагаа хамгаас чухал гэдэгт санал нэгдлээ.
“Шинжлэх ухаан ба төр” сэдэвт хэлэлцүүлгийн паналист СУИС-ийн Сургалт, эрдэм шинжилгээ эрхэлсэн тэргүүн дэд захирал, доктор (Sc.D) Ч.Алтанцэцэг: Энэхүү хурлын уриа “Хандлагаа өөрчлөе”. Бид үнэхээр хандлагаа өөрчлөх гэж байгаа бол нийгмийн бүх хүрээлэлд хүрч бий болж чадах нийгмийн инновацыг хөгжүүлэх хэрэгтэй байна. Технологи маш хурдацтай хөгжиж байна. Энд хүн хаана явна? Үүнд олон улсын эрдэмтэд анхаарал хандуулж дэвшилтэт технологи, хүн хоорондын зохицлыг хэрхэн бий болгох талаар концефци дэвшүүлж байна. Нийгмийн сайн сайхны төлөө Соёл урлагийн их сургууль өнөөгийн Монголчуудын үнэт зүйлийг тодруулах судалгаа хийж байгаа. Өнөөдрөө судлахгүйгээр бид маргааш ямар түвшинд хүрэхээ судлах боломжгүй гэлээ. Харин шинжлэх ухаан ба аж үйлдвэр (инноваци) сэдэвт хэлэлцүүлгийн паналист МХАҮТ-ын ерөнхийлөгч О.Амартүвшин: Шинжлэх ухааныг хөгжүүлье гэвэл их дээд сургуулиудын 130000 оюутны баазыг ашиглах хэрэгтэй байна. Тэднээс олон шинэ санал, санаачилга гарна. Түүнийг нь эрдэмтэн багш нар төгөлдөржүүлээд, хувийн хэвшлүүд хөрөнгө оруулах замаар шинжлэх ухаанаа хөгжүүлэх гарц бидэнд байна гэлээ.
