Ерөнхий сайд У.Хүрэлсүх "Эрдэмтэн, судлаач та бүхэн бүтэн долоон сарын хугацаанд өдөр шөнөгүй ажиллаж, улс орны гадаад болон дотоод нөхцөл байдлыг судалж, бусад орнуудтай харьцуулан хэрхэн хөгжих ёстой баримт бичгийг боловсруулсанд чин сэтгэлээсээ талархаж байна. Энэ ажлыг амжилттай зохион байгуулсан ЗГХЭГ-ын дарга Л.Оюун-Эрдэнэд талархаж байна. Алсын хараа, хөгжлийн бодлогогүйгээр улс орон хөгжинө гэдэг хэцүү. Бид цаашид улс орноо хэрхэн хөгжүүлэх талаар дунд хугацааны бодлогодоо үндэслэн улсаа хөгжүүлэх болно. Та бүхний боловсруулсан бичиг баримт Монгол Улсын хөгжлийн алтан гадас байх болно" гэв.
"Монгол Улсыг 2050 он хүртэл хөгжүүлэх хөтөлбөр"-ийг үе үеийн Засгийн газар хөтөлбөрөө болгон улс орноо хөгжүүлэх ёстойг Ерөнхий сайд хэлсэн бөгөөд уг баримт бичгийг УИХ-д өргөн барьж батлуулах болно гэлээ.
Өнгөрсөн долоон сарын хугацаанд ажлын хэсэг, ажлын дэд хэсэг хуралдаж, есөн тулгуур багана бүхий 50 зорилттой бичиг баримтыг салбар бүрийн шилдэг судлаач, эрдэмтэд нэг баг болон ажилласны үндсэн дээр боловсруулжээ. Есөн тулгуур баганад
- Үндэсний үнэт зүйл,
- Хүний хөгжил,
- амьдралын чанар ба дундаж давхарга,
- эдийн засаг,
- сайн засаглал,
- ногоон хөгжил,
- амар тайван аюулгүй нийгэм,
- бүсчилсэн хөгжил,
- Улаанбаатар ба дагуул хот багтаж байгаа аж.
ЗГХЭГ-ын дарга Л.Оюун-Эрдэнэ хамгийн сүүлийн үеийн эдийн засгийн судалгаа, олон улсын байгууллагуудтай хамтран ажилласан гэдгийг хэллээ.
УИХ-ын гишүүн асан Монгол Улсын шинжлэх ухааны гавьяат зүтгэлтэн, хэл шинжлэлийн ухааны доктор, профессор С.Дулам "Бид өнгөрсөн долоон сарын хугацаанд ажлын хэсэг, дэд хэсэг байгуулагдан Монгол Улсын хөгжлийн урт хугацааны бодлогын баримт бичгийг боловсруулах ажлыг хийлээ.
Үндэсний үнэт зүйлийг эдгээр есөн тулгуур баганын хамгийн чухал хэсэн болгосон байна. Есөн тулгуур багана бүхий 50 зорилтыг багтаасан бичиг баримтыг боловсруулсан. Салбар бүрийн шилдэг эрдэмтэн, судлаачид, мэргэжилтнүүд нэг баг болж ажилласан. Бодлогын баримт бичиг өмнөх баримт бичгүүдээс ялгаатай. Үндэсний үнэт зүйл гэдэг тулгуур баганыг есөн тулгуур баганын тэргүүлэх нь болгож, өмнөх бичиг баримтуудад анзаараагүй, орхигдуулж байсан үндэсний үнэт зүйлэд тулгуурлаж, Монгол хүний үндэсний ижилсэл, ондоошлыг тусгаж, бодлогын бичиг баримтыг хийснээрээ онцлог гэж бодож байна.
Өнөөдөр үндэстэн улс байгуулах байгуулах, цогцлоох үйл явц дэлхийд өрнөж буйтай зэрэгцүүлж, бодлогын бичиг баримтыг хийснээрээ онцлог. Монгол хүн гэж хэн бэ, Монголчуудын ижилсэл, ондоошлын гол зарчим ямар байдаг вэ гэдэгт үндэслэн бичиг баримтыг боловсруулсан. Амьдрах чадвар, урт хугацаанд Монгол улс хөгжих суурь хөрсийг нь бэлдсэн гэж үзэж байна" гэв.
Бодлогын баримт бичгийг хэрэгжүүлснээр 2050 он гэхэд Монгол Улс өндөр хөгжилтэй орнуудын босгыг алхах боломжтой гэсэн тооцоо, судалгаа гаргаад байгаа талаараа ажлын хэсгээс танилцуулав.
Харин Шинжлэх ухааны академийн дэд ерөнхийлөгч, академич, профессор Т.Дорж "Өнгөрсөн 30 жилд дүгнэлт хийж, төрийн ой санамжийг бүрдүүлж, ирэх 30 жилийн бодлогын баримт бичгийг боловсруулах нь зүйтэй" гэсэн юм.
Ерөнхий сайдын 2019 оны дөрөвдүгээр сарын 30-ны өдрийн 52 тоот захирамжаар Монгол Улсын урт хугацааны хөгжлийн бодлогыг олон улсын болон бүс нутгийн хөгжлийн чиг хандлага, хөрш орнуудын хөгжлийн бодлоготой уялдуулан шинжлэх ухааны үндэслэлтэй боловсруулах, үүнийг урт хугацааны хөгжлийн бодлого болон өнгөрсөн 30 жилийн алдаа, онооны дүгнэлт бусад бодлогын баримт бичгүүдийн уялдааг бүхэлд нь үнэлэх цаашдын бодлогын төлөвлөлт гаргах ажлын хэсгийг байгуулжээ.
Энэ дагуу тушаалаар 596 эрдэмтэн, тогтоолд ороогүй нийт 1500 гаруй эрдэмтэн судлаачид, 11400 орчим иргэд хэлэлцүүлэгт хамрагдан долоон сарын хугацаанд энэ баримт бичгийг боловсруулсан байна.
