Нийслэлийн ИТХ-ын хурал өнгөрсөн сард нэгэн анхаарал татсан шийдвэр гаргасан нь Төв цэнгэлдэхийн газрыг дуудлага худалдаагаар зарах байсан. Тус газрын 49 хувийг нийслэл эзэмшдэг. Харин 51 хувийг Төв цэнгэлдэх хүрээлэн” компанийн захирал гэгч Т.Нямдаваа эзэмшдэг юм. Нийслэлийн мэдлийн 49 хувийг 22 тэрбум 560 сая төгрөгөөр худалдаадах дүнг Засгийн газрын 2018 оны 182 дугаар тогтоолын дагуу газрын төлбөрийн суурь үнэлгээг тогтоосон. Гэхдээ зах зээлийн үнээр дахин үнэлгээ хийхээр худалдах үнэ нь нэмэгдэнэ. Дээрх мөнгөн дүн бол зөвхөн газрын үнэлгээ бөгөөд Төв цэнгэлдэхийн хөрөнгийг үнэлээд ирэхээр өртөг нь тодорхой хэмжээгээр нэмэгдэнэ гэдгийг тухайн үед албаны хүмүүс тайлбарлаж байсан. Ингэхдээ 49 хувиа эхлээд Т.Нямдаваад санал болгоно. Хэрэв татгалзвал дуудлага худалдаагаар зарна хэмээн мэдэгдсэн.
Энэ талаар Нийслэлийн Засаг даргын нэгдүгээр орлогч Ж.Батбаясгалан “НИТХ-ын ээлжит хуралдаанаас 2020 онд Төв цэнгэлдэх хүрээлэнгийн 49 хувийг хувьчлах шийдвэр гаргасан, 20 гаруй тэрбумаар үнэлнэ. Төв цэнгэлдэх хүрээлэн ашиггүй, зарлага ихтэй. Одоогийн цэнгэлдэхийн багтаамжийг 3-4 дахин нэмэгдүүлэх буюу 35-45 мянган хүний суудалтай цэнгэлдэх хүрээлэн барихаар Засгийн газар шийдвэрлэсэн. Уг ажлыг эхлүүлэх хөрөнгө 2020 оны төсөвт суусан. Жил болгон наадмаар бид сандал тавиад хамгийн ихдээ 15 мянган хүнд наадам үзүүлдэг.
Зарлага хэмнэх үүднээс цэнгэлдэхийг хувьчлалд шилжүүлэхдээ хамгийн доод үнээр нь танилцуулсан. Харин одоо Нийслэлийн өмч хувьчлалын комисс хөндлөнгийн байгууллагаар үнэлгээ хийлгэнэ. Одоо байгаа газрын барилгыг тооцолгүй, нэг га газрын үнийг тооцвол 1.6 тэрбум төгрөг болж байна. Цэнгэлдэхийг худалдсанаар өнгөрсөн хугацаанд гарсан зардлыг хэд дахин нугалах орлого нийслэлийн төсөвт орох боломжтой. Бид гарсан зардлаа хэд дахин нугалж олох ийм л зорилго тавьж байна” гэсэн юм.
Гэвч нийслэлийн удирдлагуудын дээрх “мөрөөдлийг” хэн нэгэн бусниулж эхэлжээ. Тодруулбал энэ сарын гуравны өдөр Төв цэнгэлдэхийн урд 4551мк газрыг 2,6 тэрбумаар зарах зар оржээ. Цэнгэлдэх хүрээлэнгийн газар жилээс жилд хумигдаж, олон давхар үнэтэй орон сууцууд сүндэрлэх болсон. Уг нь Төв цэнгэлдэх нийслэлийн өмч байхдаа 31 га газрыг хамардаг байж. Гэвч Т.Нямдаваагийн мэдэлд очсоноор хэдхэн жилийн дотор аравхан га болтлоо багассан. Тодруулбал Төв цэнгэлдэх хүрээлэнгийн зүүн талд Улаанбаатар хотын дарга асан Ц.Батбаяр газар авч, нэлээд том хотхон сүндэрлүүлсэн юм байна. Түүнийг залгаад УИХ-ын гишүүн Б.Чойжилсүрэнгийн “Рапид харш” мөн Ерөнхийлөгч асан Н.Багабанди, Шадар сайд Ө.Энхтүвшин, “Эрэл”-ийн Б.Эрдэнэбат УИХ-ын гишүүн А.Сүхбат газар эзэмшдэг бөгөөд Төв цэнгэлдэхийн баруун талын 1.2 га газарт дуучин Д.Оюунтүлхүүр газар авч өмчлөх эрхийг нь Т.Нямдаваагаас авсан байдаг юм.
Тэгвэл эдгээр хүмүүсийн нэг нь өөрийн эзэмшлийн газраа зарахаар болжээ. “Unegui.mn” дээрх зарыг нийтэлсэн 9916… утасны дугаартай иргэн барилга барих зөвшөөрөл буюу “А” даалгавартай гэдгийг нь тодотгосон байгаа байна. Зурагт тодруулснаас үзэхэд, Төв цэнгэлдэх хүрээлэн, Монголын хөлбөмбөгийн холбооны ногоон талбай болон Хурд хорооллын хоорон дахь хэсгийг ийн үнэлжээ.
Эх сурвалж: Tvmongolia.mn
