Төрийн албан хаагчдын ёс суртахуун сүүлийн жилүүдэд улам доройтож элдэв гэмт хэрэгт холбогдох нь элбэг тохиолдож болов. Зам тээврийн хөгжлийн яаманд гарсан хүн амины ноцтой хэрэг бүрэн шалгагдаж шийдэгдээгүй байх хооронд өчнөөн хэрэг гарч байна. Архидан согтуурах бол эгээ л ердийн, бүр байх ёстой зүйл мэт үзэж, төрийн ордондоо хүртэл архидаж суух нь энүүхэнд ажээ. Уг нь төр засгийн албан тушаалтнууд нь иргэддээ хуулиа дээдлэн шударгаар хэрэгжүүлэх ёс суртахууны үнэт чанаруудыг зөв төлөвшүүлэхэд үлгэрлэн манлайлагчид баймаар. Гэвч авлига, хээл хахууль, зодоон, хүчин гээд тэдний өдөөхгүй хэрэг гэж бараг үгүй болжээ.
Саяхан “Эрдэнэт зар” цахим хуудсанд Үнэнхүү Төөгий гэдэг нэрээр нэгэн хэргийн талаар жиргэсэн нь олны анхаарлыг татав. Тэрээр “Орхон аймгийн Улсын бүртгэлийн хэлтсийн дарга Дарамжавын Мөнхболд өнгөрсөн баасан гараг буюу 2020 оны 1 дүгээр сарын 3-ны өдөр ажлын байран дээрээ шал согтуу ирж, агсам тавьж, лаларын пизда чи гэх мэт хараалын үг урсгаж, нягтлан бодогч эмэгтэйг хүч хэрэглэн зодож танхайрсан хэрэг үйлджээ. Эмэгтэйг зүүн шанаа руу нь маш хүчтэй цохиж, ширээ мөргүүлжээ. Мөн багц том түлхүүрээр хамаранд нь цохиж гэмтээжээ. Эмэгтэй айж сандран нөхрөө дуудахад нөхөр нь ирж цагдаа дуудаж, Мөнхболд даргыг үнэртүүлэхэл 1.95 бүхэл гарчээ. Энэ гэмт хэргийг нуун дарагдуулахаар амралтын өдөр том дарга нар нь идэвхитэй ажиллажээ. Байцаалт авсан цагдаа нь нябо эмэгтэйг ажлаасаа халагдах эрсдэлтэй гээд Мөнхболд даргыг зөрчлийн тухай хуулийн 5.1-н заалтаар 100 000 төгрөгөөр торгож хэргийг хаажээ. Арай ч дээ. Ийм л дарга нар Орхон аймгийг удирдан чиглүүлж, самарч байна” гэжээ.
Энэ нь уг хэргийн талаар олон нийтэд аль болох шуурхай хүргэхийг хичээсэн шударга иргэний үг мөн болов уу. Харамсалтай нь тус аймгийн Засаг даргын Тамгын газар болон цагдаагаас тодруулах гэсэн боловч “Мэдэхгүй” гэх буюу “Хэрвээ ийм хэрэг болсон бол прокурорын зөвшөөрлөөр хариу өгч болох юм” гэсээр утсаа тасалж байлаа. Тэгвэл өөр нэг эх сурвалж энэ талаар хэлэхдээ “Орхон аймгийн Засаг даргын Тамгын газарт эмх замбараагүй юм их бий. Хэлтсийн дарга нь согтуугаар эмэгтэй хүний биед халдах бол энүүхэнд” гэсэн юм. Ер нь дээрх мэдээлэл үнэний ортой бололтой. Хот, хөдөөгүй л манай төрийн албан хаагчид нэг иймэрхүү дүр төрхтэй болоод байгаа ажээ.
О.Баяр
Шуурхай.мн
