Гашуун сухайт болон бусад хилийн боомтоор гуравдугаар сарын 2-ныг хүртэл нүүрс тээвэрлэхгүй байх шийдвэрийг Улсын онцгой комиссоос гаргалаа.
Мөн Улсын онцгой комиссын хуралдаанаас Сар шинийн баярыг тэмдэглэхгүй байх нь зүйтэй гэдэг шийдвэр гаргалаа. Уг шийдвэрээ эрх бүхий албан тушаалтанд хүргүүлэх юм байна.
Шадар сайд Ө.Энхтүвшин "УОК-оос Сар шинийн баярыг тэмдэглэхгүй байх шийдвэр гаргалаа. Хуулийн боломжоо харж байгаад уг шийдвэрийг Ерөнхийлөгчид танилцуулна" гэв.
Өөрөөр хэлбэл, УОК-ын хуралдаанаас гаргасан дээрх шийдвэрийг Шадар сайд Ө.Энхтүвшин ҮАБЗ-д танилцуулахаар боллоо. Энэ хуралдаанаар сар шинийн баярыг тэмдэглэхийг энэ жилдээ хориглох тухай эцсийн шийдвэр гарах юм.
17:15 2020/02/10
“Нүүрс тээвэрлэлтийг гуравдугаар сарын 2-н хүртэл хязгаарлах саналыг орон нутгаас гаргасан“
Улсын онцгой комиссын хуралдаан эхэллээ. Хуралдаанаар шинэ коронавирусийн халдвараас урьдчилан сэргийлэх ажлын явцтай холбоотой асуудлыг хэлэлцэж байгаа юм.
Хуралдааны эхэнд ОБЕГ-ын тэргүүн дэд дарга, бригадын генерал Г.Ариунбуянгаар ахлуулсан “Шуурхай бүлэг” хилийн боомтуудад ажилласан талаар мэдээлэл өглөө.
Өмнөговь аймгийн удирдлагын зүгээс Гашуун сухайт боомтоор гаргадаг нүүрсний тээвэрлэлтийг гуравдугаар сарын 2-н хүртэл хязгаарлах саналыг Улсын онцгой комисст гаргасан байна.
Энэ талаар Г.Ариунбуян "Дорноговь аймгийн Замын-Үүд сум дахь “Замын-Үүд”, Өмнөговь аймгийн Ханбогд сум дахь “Гашуунсухайт”, мөн аймгийн Гурвантэс сум дахь “Шивээхүрэн”, Улаанбаатар хот дахь “Буянт-Ухаа” боомтын үйл ажиллагаа, шинэ коронавирусийн халдвараас урьдчилан сэргийлэх, хэрэгжүүлж байгаа хариу арга хэмжээ, мэргэжлийн байгууллагуудын бэлтгэл бэлэн байдалтай танилцаж, үүрэг чиглэл өгсөн" гэв.
Замын-Үүд боомт:
Зам-Үүд боомтоор хоног тутам улсын хил нэвтэрч буй зорчигчдоор хилийн орох хуудас бөглүүлж, тухайн зорчигчийн талаар мэдээллийг тухай бүр сумын Онцгой комисс, Хилийн мэргэжлийн хяналтын алба, Цагдаагийн хэлтэс, аймгийн нэгдсэн эмнэлэгт өгч ажиллаж байна. Автозамаар нэвтэрсэн 6,131 зорчигч, төмөр замаар нэвтэрсэн 1,787 зорчигчид нарийвчилсан хяналт, тандалт хийж, 463 ачааны машин, зорчигч тээврийн 859 автомашинд ариутгал халдваргүйтгэл хийжээ. Мөн БНХАУ-ын Эрээн хотоос 5 өдөр 29 автобусаар 1,780 монгол иргэдийг татан авах үеэр нарийвчилсан үзлэг хяналт хийж, тээврийн хэрэгсэл, ачаа тээшинд ариутгал халдваргүйтгэл хийж нэвтрүүлсэн байна. Боомтын шинэчлэлтэй холбоотойгоор Замын-Үүд боомт түр горимоор ажиллаж байгаа бөгөөд ариутгалын пункт, тусгаарлах байрыг буулгасан тул түр байр бэлтгэн ажиллаж байна.
Буянт-Ухаа боомт
Хилийн боомтоор 01 дүгээр сарын 28-аас 02 дугаар сарын 07-ны хооронд нийт 89 орны 18,357 зорчигч, 8 орны 182 тээврийн хэрэгсэлд нарийвчилсан үзлэг шалгалтыг хийж нэвтрүүлсэн.
Мөн 02 дугаар сарын 01-ээс эхлэн Европоос бусад бүх рейсийн агаарын хөлгийн зорчигчдоос эрүүл мэндийн тодорхойлолт хурааж, тандалт судалгаа хийж ажиллаж байна. Тусгаарлах байртай, бэлэн байдлын нөөц, хувийн хамгаалах хэрэгслийн нөөц багассан байгаа аж.
Хилийн боомтуудад ажиллах үеэр “Шуурхай бүлэг”-ийг ахлагч, ОБЕГ-ын тэргүүн дэд дарга, бригадын генерал Г.Ариунбуян үүрэг гүйцэтгэж байгаа бүх байгууллага, аж ахуйн нэгж, иргэд өөрсдийн эрүүл мэнд, аюулгүй байдлаа сайтар хамгаалах хэрэгтэйг сануулж, эрдэс баялгийн тээвэрлэлтийг түр зогсоох санал болон боомт дээр ажиллах нөхцөл хүнд байгаа гэдгийг онцоллоо.
