Баянгол дүүргийн Засаг дарга асан өдгөө Төрийн банкны Орон нутгийн удирдлагын хэлстийн дарга Л.Амгалан ирэх сонгуульд МАН нэр дэвших санаатай их л эртнээс “дулдуйдаж” яваа бололтой. Уг нь МАН түүнд олон удаагийн боломж олгосон ч тэр өнөөг хүртэл парламентад тангараг өргөх хувь нь дутсан. Гэсэн ч нам нь мань хүнийг огт хоосон орхилгүй ямар нэгэн байдлаар “дарга” болгосоор ирснийг түүний намтраас харж болно. Баянгол дүүргийн орлогч дарга, дараа нь Засаг дарга байхаасаа л тэр төсвийн мөнгөнөөс хумсалсан, төрийн албыг төрлийнх болгохоор зүтгэж дүүргийнхээ 15 хүнийг ажлаас нь халж, ХОМ-ээ хүртэл нууцалж бишгүй арга зальтай болохоо харуулсан нэгэн.
Энэ удаа Л.Амгалан НАМЭХ-ны дэд ерөнхийлөгчийн сонгуульт ажилтай учраас өөрт нь бага ч атугай дэмжлэг болно гэж тооцоолсон бололтой. Үүндээ нэмэр болгож нэр дэвших эрхээ “ногоон” гэрлээр олж авахын тулд Баянгол дүүргийн МАН-ын дарга УИХ-ын гишүүн Ж.Ганбаатарт ихэд ойр шадарлаж, өмгөөлж, хамгаалж явах болжээ. Гэхдээ Л.Амгалан ганц энэ удаа Ж.Ганбаатарыг тойглож яваа юм биш.
Эрхэм хатагтай аль эртнээс өөрт ашигтай хэнбугайтай ч гар барьдаг, зальжин. Бүр 1996 онд ардчилсан хүчин төрийн эрхэнд гарсан үед “Улаанбаатар” сангийн даргаар ажиллаж байсан. Энэ нь тухайн үед Нийслэлийн Засаг даргаар Ж.Наранцацаралт томилогдсонтой нь холбоотой. Тэд дунд сургуульд нэг ангид суралцдаг байсан учраас ангийн “охиноо” өөд нь татаж, мань Л.Амгалан ч АН-ын далбаанд эргэлдэж байсан үе. Ердөө л эндээс харахад түүнд хэн хэрэгтэй байна түүнийг л түшдэг гэдэг нь харагдана.
Өнгөрөгч 2016 оны УИХ-ын сонгуулийн өмнө өөрийгөө олон нийтэд “ногоон малгай”-тайгаар дахин танилцуулахдаа Л.Амгалан улайхгүйгээр худал хэлдгээ ч харуулсан хүн. Товчхондоо, эх орончдын өдрөөр мэндчилгээ дэвшүүлэхдээ улаан таван хошуу бүхий ногоон малгайтай байсныг уншигчид санаж буй биз ээ. Үүнийгээ тайлбарлахдаа миний “Миний малгайны өнгийг өөрчилчихсөн байна. Би уг нь бор хүрэн малгай өмссөн юм. Гэтэл өчигдөр орой “youtube”-д байршуулчихаад өглөө ирээд хартал ногоон өнгөтэй болгочихсон байна лээ.” Гэж ярьж суусан хүн дээ. УИХ-ын сонгуулийн квотод заасны дагуу эмэгтэйчүүддээ улстөрийн намууд тойрог хувиарлах нь гарцаагүй. Гэхдээ Л.Амгалан шиг худалч, хуурмаг хүн бол ялалт бус ялагдал хүлээнэ гэдгийг нам нь өдгөө мэддэг болсон байлгүй дээ. Төрсөн цагаасаа даргын суудалд тухлах санаархалтай хүмүүс шиг аяглахаа больж одоо амарч үз, Л.Амгалан дарга минь.
Erennews.mn