Өнгөрсөн онд МАХН ээлжилт II-р их хурал төрийн ордонд зохион байгуулагдсан.Тус хурлаар МАХН- ын даргыг сонгож нийт сонгогчдийн 94.4 хувийн саналаар УИХ-ын гишүүн О.Баасанхүү сонгогдсон. Тэрээр МАХН-ын даргаар сонгогдсоноо бүртгүүлэхээр Улсын дээд шүүхэд хандасан. Уг шүүх хурал 01 сарын 05 ны өдөр болохоор товлогдсон ч МАХН-ын дарга Н.Энхбаяр, УИХ-ын гишүүн О.Баасанхүү нарын хүсэлтээр хойшлогдсон бол өнөөдөр түүнийг намын даргаар батлах тухай шүүх хурал боллоо.Түүний зохион байгуулсан II-р их хурлыг МАХН-ын удирдлагууд хууль зөрчсөн, хэмээн үзэж байсан. Хэрэв хүчин төгөлдөр бус бол МАХН-ын дарга Н.Энхбаяр хэвээр үлдэх юм.Харин өнөөдөр Улсын Дээд шүүхээс О.Баасанхүү гишүүнийг МАХН-ын даргаар бүртгэхээс татгалзсан байна.
Шүүхийн шийдвэр бүрэн эхээрээ:
МАХН-ын дүрмийн өөрчлөлт болон шинээр сонгогдсон даргыг бүртгүүлэх тухай О.Баасанхүү нарын хүсэлтийг Дээд шүүх 2018 оны нэгдүгээр сарын 19-ны өдөр хэлэлцлээ.
Хүсэлт гаргагч О.Баасанхүү нь “2017 оны 10 дугаар сарын 31-ны өдрийн ээлжит бус Бага чуулганаас намын II Их чуулганыг хуралдуулах шийдвэрийг гаргасан, намын II Их чуулган 2017 оны 12 дугаар сарын 9, 10-ны өдрүүдэд хуралдаж, намын дүрэмд өөрчлөлт оруулж , намын даргыг шинээр сонгосон тул бүртгүүлэх” хүсэлтийг гаргажээ.
МАХН-ын дүрмийн 9.1-д зааснаар МАХН-ын удирдах дээд байгууллага нь Их чуулган, намын төлөөллийн төв байгууллага нь Бага чуулган байх ба дүрмийн 10.3-т зааснаар Намын Их чуулганы хуралдах тов, төлөөлөгчдийн тоо, тэдгээрийг сонгох журмыг Бага чуулганаас тогтоодог байна.
Улсын Дээд шүүх хүсэлтийг хүлээн авч, хуралдаанаар хянан хэлэлцэх явцад намын гишүүд нь Бага чуулганы гишүүдийн тоо, гишүүдийн нэрс, түүнчлэн намын гишүүн мөн эсэх талаар хоорондоо маргаантай, намын II Их чуулганыг хүчинтэй гэж үзэх боломжгүй байдал тогтоогдсон байна.
Улс төрийн намын тухай хуулийн 13.9-д зааснаар намын дүрмээр зохицуулах намын дотоод зохион байгуулалт, үйл ажиллагаатай холбоотой маргааныг шүүх хянан шийдвэрлэхгүй. Намын эрх бүхий байгууллага өөрөө шийдвэрлэдэг тул Улсын Дээд шүүх МАХН-ын дүрэмд өөрчлөлт оруулах, намын даргаар О.Баасанхүүг бүртгэхээс татгалзаж шийдвэрлэв гэж Улсын Дээд Шүүхээс мэдээллээ.
Эх сурвалж Л.Дима Шуурхай.мн
