ЭМЯ-наас ээлжит мэдээллээ хийлээ. ЭМЯ-ны албаны дарга Д.Нарангэрэл хэлэхдээ "Халдвар маш хурдацтай тархаж байна. ОХУ-д өвчлөл өмнөх сараас гурав дахин нэмэгдсэн. Тохиолдлын ихэнх нь Москва хотын орчимд гарч байна. Өөрийгөө тусгаарлах дэглэм сайн бариагүйгээс өвчлөл тархаж байгаа. Энэ нь үргэлжлэх, өөр бүс нутаг руу тархах магадлалтай байна. Энэ өдрүүдийг хамтдаа даван туулна. Гэртээ байж, тусгаарлалтын дэглэмийг маш сайн барьж, зайнаас харьц. 30 хувь нь шинж тэмдэггүй, балархай байгаа учраас энэ сарын хугацаанд эмнэлгээр явахгүй байхыг онцгойлон анхааруулсан байна.
БНХАУ-д 36 тохиолдол зөөвөрлөгдөн орж ирсэн байна. Тиймээс гадаадаас ирсэн иргэдийг 28 хоног тусгаарлах шийдвэр гаргажээ. Манайд зөөвөрлөгдөж батлагдсан 30 тохиолдол байгаагаас таван хүн эдгэсэн. Өнөөдрийн хувьд сэжигтэй тохиолдол бүртгэгдээгүй, ажиглалтад байгаа хүмүүсийн биеийн байдал хэвийн. 119 дугаарын утас 24 цагаар ажиллуулж байна. Ирж буй дуудлагын ихэнх нь "Сонгдо эмнэлэгтэй холбоотой байна.
"Сонгдо" эмнэлэгт хоёр хүнд түргэвчилсэн тестээр эерэг гарсан нь олон хүнийг сандаргалаа. Энэ тест бол уураг илрүүлдэг оношлуур. Манай хоёр хүн харшил, халдварын өвчтэй байсан учраас уураг нэмэх гарсан байна. Тиймээс манай иргэд дунд коронавирус байхгүй байна гэдгийн баталгаа болж байна гэж хэлж болохоор байна" гэв.
ХӨСҮТ-ийн дарга Д.Нямхүү: "Түргэвчилсэн тестээр өмнө нь бас хуурамч дүн үзүүлж байсныг бид мэдээлж байсан. Энэхүү оношлуурыг зөвхөн тандалт судалгааны зориулалтаар ашиглаж байгаа. Түргэвчилсэн оношлуур эцсийн шинжилгээний хариу болохгүй гэдгийг хүн бүр анхаарах хэрэгтэй. Дараа нь ХӨСҮТ-д лабораторийн шинжилгээний эцсийн шийд гарч байж баталгаажуулах болно гэдгийг анхаарах хэрэгтэй. Өчигдөр ХӨСҮТ-д тусгаарлагдсан 30 хүнд, тандалтын шугамаар хийсэн сорьцуудад вирус илрээгүй. ХӨСҮТ-д нийт 245 хүн байна. Эмчлүүлж байгаа хүмүүсийн биеийн байдал тогтвортой сайн байна" гэлээ.
