Дэлхийн 120 гаруй орны, сая сая хэрэглэгчийн амтархан зооглодог шарсан тахианы сүлжээ ресторан болох алдарт KFC-ийг тойрсон хэл ам тасардаггүй. Энэ удаад KFC сүлжээний хоолонд хордсон гэх иргэд ХӨСҮТ-д эмчлүүлж гэх мэдээлэл цацагдлаа. Тодруулбал, Энэ сарын 9, 10, 11-нд KFC сүлжээний Зайсан салбараар үйлчлүүлж, "Найзууд" багцыг авч идсэн болон захиалж авсан хүмүүс хордсон талаар мэдээлэл цахим орчинд тархаад байна.
Үүнтэй холбогдуулан, тухайн өдрүүдэд KFC сүлжээний Зайсан салбараар үйлчлүүлсэн тэр дундаа "Найзууд" багцыг авч идсэн хүмүүст хоолны хордлогын шинж тэмдэг илэрвэл яаралтай эмнэлэгт хандахыг мэргэжлийн байгууллагаас анхааруулж байгаа юм байна.
Энэ талаар бид ЭМЯ-наас тодруулахад, "Тийм мэдээлэл байгаа. ХӨСҮТ-өөс тодруул" гэв.
Харин ХӨСҮТ-өөс тодруулахад, "Одоогоор мэдээлэл өгөх боломжгүй байна. Манайхаас ажлын хэсэг гараад судлахаар явсан. Маргааш холбогдоорой" гэх хариултыг өгсөн бол KFC-гийн Зайсан дах салбарынхан мэдээлэл өгөхөөс татгалзсан юм.
Бид энэ талаар эргэн мэдээлэх болно.