Тэд онц байдлын үеэр дураараа дургиж байна

Засгийн газрын ХЭГ-ын дарга Л.Оюун-Эрдэнэ УИХ-ын чуулганы хуралдааны үеэр ““Эрдэнэт үйлдвэр”-ийн талаар танилцуулмаар байна. Цаг өгөөч” гэсээр өнгөрсөн. Үндсэндээ түүнд олгох цаг олдоогүй гэх үү дээ. Эсвэл цаг олдохгүйг мэдсээр байж тэгж попорсон ч юм билүү хэн мэдлээ.

Юутай Л.Оюун-Эрдэнэ олныг шуугиулан “Эрдэнэт үйлдвэр”-т онцгой дэглэм тогтоосноо зарлан тунхагласан. Ингэхдээ оросын талаас авсан бүхнийг буюу “Монголросцветмет”-д дээрх дэглэм хамтдаа хэрэгжихээр болсон.

Түүнийг анх онцгой дэглэм гэж чанга дуугарснаас хойш жил гаруйн хугацаа өнгөрч байгаа ч өөрчлөлт хийгдсэн нь алга. Харин ч олон нийтийн хараанаас халхавчилсан явдал болсон. Ямар сайндаа л онц дэглэмийн үеэр 500 орчим хүн ажилд авч, 400 гаруй хүнд орон сууцны дэмлэгж хэмээн хөрөнгө зарцуулж байх вэ. Дээрх 400 гаруй нь олон жил үр бүтээлтэй ажилласан нөхөд мөн эсэх нь ч эргэлзээтэй. Бид энэ талаар өмнө нь мэдээлж байсныг уншигч та санаж буй биз ээ.

Тэгвэл тус үйлдвэрт үнэхээр шалгалт хийж, хяналт тавьж байгаа бол харилцагч аж ахуйн нэгжүүдийн удаан жилийн “нөхөрлөл”-ийг нягталж үзсэн болов уу гэдгийг асуумаар байна. Тодруулбал, тус үйлдвэрт шахаа хийсээр ирсэн “Хан хув” гэж компани бий. Өмнө нь “ТЭЦ 4” ТӨХК-ийн захирлаар ажиллаж байгаад “дээлээ нөмөрсөн” С.Анхбаярын мэдэлд байдаг талаар яриддаг байсан. С.Анхбаярыг ХЗДХ-ийн сайд Ц.Нямдорж хуурай дүү гэдгийг ч олон нийт мэддэг болсон. Гэхдээ тус компани нь ОХУ-аас олон жилийн хугацаанд химийн бодис импортолсоор ирсэн. Түүнийгээ “Эрдэнэт үйлдвэр”-т нийлүүлсээр ирсэн.

Дээрх зургаас харахад түүвэрлэсэн байдлаас харахад 22 гэрээний үнийн дүн нь 47.248.806 ам.доллар буюу ойролцоогоор 125 тэрбум орчим төгрөг болохоор байгаа юм.

Мэдээж тендер зарлаж байж худалдааны гэрээ хийх нь гарцаагүй. Гэхдээ он цаг өнгөрсөн ч “Хан хув”-тай өрсөлдөх ААН огт байдаггүй гэж ойлгох уу. Аль эсвэл эзэн нь сайн ахтай учраас өнөөдрийг хүртэл шахаа нь хийгдсээр байна гэж ойлгох уу.

Түүнчлэн Л.Оюун-Эрдэнэ сайдын зарласан гээд байгаа онцгой дэглэм нь “Монголросцветмет”-д үйлчилж байгаа эсэх нь эргэлзээтэй. Тодруулбал, тэвчиж болох зардлуудаа ч хасахгүй, бүр спорт холбоод санхүүжүүлж байгааг нь шилэн данснаас нь харж болохоор байгаа юм.

Дээрх үйлдвэрүүдийг төр 100 хувь эзэмшдэг боллоо гээд баярлах бус харин ч эсрэгээрээ шахааны бизнесээ улам бүр цэцэглүүлж, улстөрийн шоу хийх талбар болгож байгаа юм биш үү. Онцгой дэглэм гэж яг ямар зарчмаар ажиллах үүрэг өгснийг нэрлээд байгаа юм бол.

Нийтлэлч Б.Төгөлдөр

http://erennews.mn/article/34053