Өнөөдөр хүүхдийн баярын өдөр тохиож байна. Бид л тэгж нэрлээд сурчихсан болохоос биш уг чанартаа Хүүхдийн эрхийг хамгаалах олон улсын өдөр юм.
Анх 1925 онд Женев хотноо болсон Хүүхдийн сайн сайхны төлөө дэлхийн чуулга уулзалтаас зургадугаар сарын 1-ний өдрийг дэлхий нийтээрээ “Хүүхдийн эрхийг хамгаалах өдөр” болгох уриалга гаргаж байжээ.
Улмаар 1959 оны 11-р сарын 20-ны өдөр НҮБ-ын Ерөнхий ассамблей “Хүүхдийн эрхийн тунхаглал”-ыг баталж байв.
Монгол Улсад хүүхдийн эрхийг хамгаалах өдрийг 1952 оноос эхлэн тэмдэглэж ирсэн бөгөөд 1995 оноос Монгол Улсын Ерөнхийлөгч П.Очирбатын зарлигаар энэ өдрийг "Эх үрсийн баяр" болгон нэрлэж байв.
Харин 2003 оны тавдугаар сарын 22-нд УИХ дээрх зарлигийг цуцалж “Хүүхдийн баяр” гэж нэрлэн хүүхдийн эрхийн талаар анхаарлаа хандуулдаг өдөр болгон үндэсний хэмжээнд, амралтын өдөр болгон хуульчлан тэмдэглэдэг болсон юм.
Эх орны ирээдүй болсон энхрий бяцхан үрсдээ Хүүхдийн баярын мэнд хүргэж, инээд баясал, жаргал жаргалын дээдийг ерөөж байна. Сайхан баярлаарай хүүхдүүд ээ.