Орон нутгаас нийслэлд гацаад байгаа иргэдтэй холбоотой асуудлаар Шадар сайд Я.Содбаатар сая мэдээлэл өглөө. Орон нутгийн иргэдийг нэгдсэн системд бүртгэн шинжилгээ авсны үндсэн дээр нутаг буцаах аж. Харин орон нутаг иргэдээ хомроголон тусгаарлах асуудал гаргаж болохгүйг тэрээр санууллаа.
Тодруулбал “Одоогоор орон нутгуудыг ямар нэгэн захиргааны шийдвэр гарахыг хориглочихсон байгаа. Зарим аймгийн дарга нар томилогдоогүй байгаа. Зарим сумын удирдлага шинээр томилогдсон байх. Нэг удирдлагатай нэгдсэн мэдээллээр ажиллана гэдгийг хатуу сануулъя. Улаанбаатар хотод түгжигдээд байгаа хөдөө орон нутгийн иргэдийн судалгаа хийгдсэн. Удахгүй 119.мн гэсэн бүртгэлийн системийг ажиллуулна. Үүний дагуу түргэвчилсэн оношлуур, PCR шинжилгээнд хамруулаад цагдаагийн удирдлага хяналтан дор энэ хүмүүсийг явуулна. Улаанбаатар хотод удаан байлгахгүй. Очоод эдгээр хүмүүс гэрийн тусгаарлалтад өөрсдийгөө оруулж аймаг орон нутгийн удирдлагууд хүчний байгууллага хяналт тавих юм. Нөгөө талд тухайн орон нутгууд дур мэдэн тусгаарлах байранд оруулах иргэдийг хомроголон оруулах ёсгүй. Мэдээж гаднаас ирж байгаа иргэдийнхээ халууныг хэмжих гэх мэт хяналт тавих нь зөв. Гэхдээ хомроголон буудалд байрлуулна гэж байхгүй” гэлээ.
Эх сурвалж: shuurhai.mn Г.ОЧИР