Шатахуун импортлогчид татвараа тэглүүлсэн ч 6 сарын дараа шатахууны үнийг дахин нэмлээ

Шатахуун импортлогчид өчигдөр бензиний үнийг өнгөрсөн шөнө нэмжээ. Тодруулбал, зарим зарим компанийн шатахуун түгээх станцууд АИ92 бензинийг 100 орчим төгрөгөөр нэмж борлуулж байлаа. Өчигдөр 22 цагийн байдлаар“Петровис” компани  АИ92-ийг 1830 төгрөг байсныг иргэд мэдээлж байна.

Яагаад шатахууны үнэ нэмэгдсэн талаар бид тодруулахаар албаны хүмүүстэй холбогдлоо.

Шатахууны үнэ нэмэгдсэн нь гадаад зах зээлтэй холбоотой эсэх болон манай импортлогчид үнийг нэмсэн нь үндэслэлтэй эсэх талаар ШӨХТГ-ийн хэлтсийн даргаас асуухад “Яг одоо Үнийн зөвлөлийн ажлын хэсэг хуралдаж байгаа тул хурал дуустал мэдээлэл өгөх боломжгүй” гэв. Харин эх сурвалжийн хэлснээр, Засгийн газрын ажлын хэсгээс шатахууны импортын үнийг нэмэх зөвшөөрөл өгсөн гэж байлаа.

Шатахуун импортлогчид үүний өмнө өнгөрсөн оны эцэст үнийг нэмж хомсдол бий болгосны эцэст хамгийн эрэлттэй АИ92, А95 төрлийн шатахууны татвараа тэглүүлж чадсан билээ. Гэтэл ийнхүү зургаахан сарын дараа шатахууны үнийг нэмсэн нь иргэдийг бухимдуулж байна. Засгийн газраас газрын тосны үйлдвэрийн дэд бүтцийн ажлыг эхлүүлэнгүүт шатахуун импортлогчид эсэргүүцэж байгаа юм шиг үнийг нэмснийг  иргэд шүүмжилж байна. Тэд, газрын тосны үйлдвэрээ барьж ашиглалтад оруултал нь Засгийн газрыг амраахгүй бололтой.  

Харин бидний газрын тосоо авдаг ОХУ-д байдал огт өөр байгааг "Риа Новости" агентлагийн мэдээнээс харж болохоор байна. "Шатахууны үнэ Москвад гурав дахь долоо хоногтоо буурч байна" гарчигтай уг мэдээнд   "шатахууны дундаж үнийг 5-р сарын 31-нээс 6-р сарын 4-ний хооронд тогтоосноор сүүлийн гурван долоо хоногийн турш буурч байна. Шатахууны жижиглэнгийн үнэ өнгөрсөн сарын эхээр 41, 42, 43 рубль давж байсан ч Сайд нарын танхимд бензин, дизелийн түлшний онцгой албан татварыг бууруулахаар шийдсэн бөгөөд газрын тосны томоохон компаниудтай тохиролцсоноор тавдугаар сарын 30-ны өдрөөс ийнхүү буурсан" гэжээ.