ЭМЯ-ны албан ёсны мэдээллийн дараа ХӨСҮТ-ийн Тандалт судалгааны албаны дарга А.Амбасэлмаа сэтгүүлчдийн сонирхсон зарим асуултад хариуллаа. Тэр дундаа ОХУ-аас ирсэн 300 гаруй хүний шинжилгээг маш нарийн хийж байгаа талаар ярьсан юм. Тэрбээр "Өчигдөр бид шөнийн 3 цаг хүртэл ОХУ-аас ирсэн оюутнуудынхаа шинжилгээг хийж дуусгалаа. Урьдчилсан байдлаар 18 хүнээс коронавирус илэрлээ.  Цааш нь үргэлжлүүлээд шинжилгээ хийнэ. Дахин давтан шинжлэх шаардлагатай сорьцууд байгаа. Тэндээс нэмж вирус илэрсэн эсэх нь удахгүй мэдэгдэнэ. Ямар ч байсан эхний ээлжинд 18 хүнээс илэрчихлээ. 

Шинж тэмдэггүй, хөнгөн балархай хэлбэрээр өвчлөөд ирсэн хүүхэд, залуучуудаа авчраад, эмчилнэ гэдэг сайн. Тиймээс ард иргэд уужуу тайван байж, хүүхдүүддээ сэтгэлийн дэм өгөх хэрэгтэй. Нэг үе бодвол манай эмч нар эмчлэх аргаа олчихсон. Ирсэн оюутнууд хөнгөн балархай шинж тэмдэгтэй, бүр шинж тэмдэггүй байгаа. Дэлхий нийтээрээ эрт илрүүлэх чиглэлээр ажиллаж байна. Харин ч бид эрт илрүүлээд, залуучуудаа эмчилж байгаа нь сайн. Энэ бол шинэ халдвар учраас нууц үеийн хугацаа нь тодорхойгүй байна. Одоо болтол тодорхой болоогүй байгаа шүү. 14-21 хоног л гэж байгаа. Манай улс ямар ч байсан 21 хоног тусгаарлах нь зүйтэй" хэмээлээ.