Нийслэлийн МАН-ын хороо НИТХ-ын сонгуульд нэр дэвшигчдээ тодруулж дууссантай холбоотойгоор Нийслэлийн МАН-ын хорооноос мэдээлэл хийж байна. Энэ үеэр, УИХ-ын гишүүн, Нийслэлийн МАН-ын хорооны дарга Д.Сумъяабазар дараах мэдээллийг өглөө. Тэрээр, “Аймаг, Нийслэл, Сум, Дүүргийн Иргэдийн Төлөөлөгчдийн хурлын сонгуулийн тухай хуулийн дагуу бид Нийслэлийн Монгол Ардын Намын хорооны IV хуралдаанаа хийж хуулийн хугацаандаа амжин өчигдөр 23 цаг 10 минутанд нийт нэр дэвшигчдээ тодрууллаа.
УИХ-ын 2020 оны ээлжит сонгуулийн амжилтаа буухиалж, үнэмлэхүй ялалтаа орон нутагт бататгах чухал цаг үе ирлээ. 2020 оны УИХ-ын сонгуулиар Монгол Ардын Нам Нийслэл Улаанбаатар хотод 24 мандатаас 22-ыг буюу 91.7 хувийн түүхэн ялалт байгуулсан.
Энэ ялалт бол ард түмнээс Монгол Ардын Намын:
Томоохон бүтээн байгуулалтыг эхлүүлж чадсан шаргуу хөдөлмөрийг сонгосон сонголт байсан,
Айл гэрийн эзэн, ноён нуруу шиг байж чаддаг зангарагтай чанарыг сонгосон сонголт байсан,
Агаарын бохирдлыг бууруулж, цар тахлаас иргэдээ хамгаалж чадсан, харь газраас иргэдээ авчирч эхэлсэн хүнлэг, хариуцлагатай байдлыг сонгосон сонголт байсан.
Энэ том сонголтоор ирсэн итгэл найдварыг эх орны зүрх болсон Нийслэлдээ үргэлжлүүлэх үүрэг хариуцлага бидэнд ирж байна.
Нийслэлчүүд утаагүй, түгжрэлгүй, хоггүй, аюулгүй, бухимдалгүй хотыг хүсч байна.
Нийслэлчүүд орон сууцтай, ногоон байгууламжтай, ажлын байртай, эрүүл, боловсролтой, соёлтой, ээлтэй хотыг иргэд хүсч байна. Тийм ч учраас дээрх асуудлуудыг бид сайтар судалж тооцсоны үндсэн дээр өнгөрсөн 4 жилийн хугацаанд хийж эхлүүлсэн ажлаа үргэлжлүүлэх, шинээр хийж хэрэгжүүлэх оновчтой шийдлүүдээ бид Нийслэлийн Иргэдийн Төлөөлөгчдийн Хурлын 2020 оны ээлжит сонгуульд дэвшүүлсэн мөрийн хөтөлбөртөө тусгасан байгаа.
Би нийт нэр дэвшигчиддээ
-Нийслэлийн Иргэдийн Төлөөлөгчдийн хурал хэмээх төлөөллийн том байгууллагад нэр дэвших намын гишүүд маань нэг сая 300 мянган хүнтэй хотын төлөө би юу хийж чадах вэ гэдгээ өөрөөсөө асууж, дүгнэж цэгнээрэй.
-Харин олуулаа хамтарч нэг хүч, нэг зорилготой бол юуг хийж, ямар Нийслэлийг бүтээж чадах вэ гэдгээ одооноос бодож эргэцүүлж нэг үзээрэй гэж сануулсан, анхааруулсан байгаа.
Иргэдийнхээ итгэлийг даах хүчтэй, очоод уулзах нүүртэй байхаас бидний ажил бас хариуцлага эхлэх ёстой.
Нийслэлийн есөн дүүргийн намын байгууллагын 40 гаруй мянган гишүүдийн төлөөлөл болж 45 хүн нэр дэвшсэн. Бас цаана нь нэг Төлөөлөгчийн ард нийслэлийн нэг сая 300 мянган иргэний эрх ашиг хүлээж байгаа.
Бид энэ удаа нэр дэвшүүлэхдээ Нэгдүгээрт, эх орноо гэсэн сэтгэлтэй, ёс зүйтэй, хоёрдугаарт, мэдлэг боловсролтой, гуравдугаарт ажлын дадлага туршлагатай байх Монгол Ардын Намын дарга У.Хүрэлсүхийн зарчмыг иш үндэс болголоо.
Мөн хүйсийн тэнцвэртэй байдлыг хангах тухай Аймаг, Нийслэл, Сум, Дүүргийн Иргэдийн Төлөөлөгчдийн хурлын сонгуулийн тухай хуулийн 29 дүгээр зүйл, Монгол Ардын Намын дүрмийн 1 дүгээр зүйлд тус тус заасны дагуу нийт нэр дэвшигчдийн 20-оос доошгүй хувьд эмэгтэйчүүд байх шаардлагад нийцүүллээ.
Үүний зэрэгцээ хоёр удаагийн томоохон суурь судалгааны дүн, Нийгмийн Ардчилал Монголын Залуучуудын холбоо, Нийгмийн Ардчилал Монголын Эмэгтэйчүүдийн холбооноос ирүүлсэн нэр дэвшүүлэх тухай саналуудыг дүүргийн Монгол Ардын Намын хороодын дарга нартай сайтар зөвшилцөн Тэргүүлэгчдийн хурлаараа шүүн хэлэлцэж, нэр дэвшүүлэхээр шийдвэрлэснийг онцлох нь зүйтэй.
2020 оны УИХ-ын сонгуулийн дүн болон удаа дараагийн судалгаануудаас үзвэл сонгогчдын хандлага өөрчлөгдөж байна. Иргэд улс төрийн сонголт хийхдээ нэн тэргүүнд нэр дэвшигч, мөрийн хөтөлбөрийг чухалчлан үзэхийн зэрэгцээ эрч хүчтэй, нийгмийн шинэ дүр төрхийг олонх нь дэмжих хандлагатай болжээ.
Энэ удаагийн Нийслэлийн Иргэдийн Төлөөлөгчдийн Хурлын Төлөөлөгчдийг бид Нийслэлд Ардын Нам болоод Ардын хувьсгалын дараагийн зуун жилийн хөгжлийн эхний шанг татах хүмүүс гэж ойлгож, том зургаар бас итгэл хариуцлагын том шанагаар хэмжиж харах учиртай.
Бусад намууд Орон нутгийн хурлын сонгуульд албан бус эвсэл болж оролцохоо зарлалаа. Улс оронд Covid-19 цар тахлын үеийн онцгой дэглэмтэй байгаа энэ үед бид ариутгал халдваргүйжүүлэлтдээ онцгой анхааран, улс төрийн өндөр ёс зүйтэй, хуулийн хүрээнд сонгуульд өрсөлдөх болно. Бусад намууд, бие даагчиддаа ч мөн өндөр ёс зүйтэй сонгуульдаа оролцохыг уриалж байна” гэлээ.
