НИТХ-ын сонгуульд өрсөлдөх намууд Нийслэлийн сонгуулийн хороонд бичиг баримтуудаа хүлээлгэн өгсөн. Энэ талаар Нийслэлийн сонгуулийн хорооны дарга Ү.Ганболдоос зарим зүйлийг тодрууллаа. 

-Намууд нэр дэвшигчдийнхээ материалыг хүлээлгэн өгсөн. Энэ удаагийн сонгууль юугаараа онцлог болох бол? 

-Аймаг, нийслэл, сум, дүүргийн иргэдийн төлөөлөгчдийн сонгох сонгуулийн хуульд заасны дагуу энэ сарын 6-ныг дуустал нам эвслүүд, сонгуульд оролцох нэр дэвшигчдээ тодруулсан. Ингээд 9.6-.9.9-ний хооронд нэр дэвшигчдийнхээ материалыг сонгуулийн хороонд бүртгүүлэх ёстойн дагуу намууд нэр дэвшигчдийнхээ материалуудыг хүлээлгэн өгсөн. Бие даагчид мөн материалаа өгсөн байгаа. 

-Материалтай хэд хоногийн дотор танилцаж хариу өгөх вэ? 

-Сонгуулийн тухай хуулийн дагуу 7 хоногийн дотор судлаад холбогдох шийдвэрийг гаргана. Зөрчилтэй бол бүртгэхгүй. 

-НИТХ-ын сонгуульд нэр дэвшиж байгаа хүмүүс дүүргийн ИТХ-д давхар дэвшинэ гэх мэдээлэл яваад байна. Энэ талаар мэдээлэл өгөөч? 

-Энэ удаагийн сонгуулиар сум, дүүрэг, аймаг нийслэлд давхар нэр дэвшиж болж байгаа. Дүүргийн ИТХ-д нэр дэвшсэн иргэн НИТХ-д мөн давхар нэр дэвшиж болно. Энэ эрх нь нээлттэй. Сүүлийн хоёр сонгуульд энэ зохицуулалтыг хассан байж байгаад энэ удаагийн сонгуулиар дахин сэргээн оруулж байна. 

Б.Аз