ШӨХТГ-аас өнгөрсөн 5 дугаар  сард ШТС-уудад шатахууны чанар болон шахалттай холбогдуулан хяналт, шалгалт хийсэн. Тэгвэл хяналт, шалгалтын дүнг өнөөдөр олон нийтэд мэдээллээ.

ШӨХТГ-ын Өрсөлдөөний бодлого зохицуулалтын газрын дарга Т.Батцэцэг “Хяналт шалгалтын хүрээнд нийт 19 аж ахуйн нэгжийн ШТС-уудыг хамруулж, шатахууны дээж аван шинжилгээнд хамрууллаа. Магнай трейд, Мон-Суль, М-Ойл, Содмонгол, Петровис, Петростар, Нью энержи стар ШТС-уудын худалдаалж буй шатахуунууд бүгд Монгол Улсын стандартын шаардлага хангаагүй” гэх мэдээллийг өглөө.

Түүнчлэн шалгалтаар "Тэс петролиум ХХК"-ийн дизель болон А92 бензинээс, "Шунхлай ХХК"-ийн А95 бензинээс, "Синчи Ойл ХХК"-ийн А92 бензинээс, "Петрожамп ХХК" А92 бензинээс ус, лаг илэрчээ.

Мөн шатахуун худалдаа эрхлэгчдийн дунд картын хөнгөлөлт, урамшуулал зарлаж байгаатай холбогдуулан иргэдэд олгож байгаа урамшууллыг ойлгомжгүй, хэрэглэгчийг төөрөгдүүлсэн байдлаар зохион байгуулсан тул хуулийн дагуу зөрчил дутагдлыг таслан зогсоожээ. Тодруулбал, Тэс петролиум ХХК нь иргэд, хэрэглэгчдэд урамшуулалт худалдааг зохион байгуулахдаа 100 хүртэлх төгрөгийн урамшуулал гэх нэрээр ямар төрлийн шатахууныг хэрхэн хямдарсан нь ойлгомжгүй зөрчлийг илрүүлсэн байна. 

Есдүгээр сарын 7, 8-ны өдрүүдэд бөөнөөр худалдах үйл ажиллагаа эрхэлж буй газруудад шатахуун хадгалах, нөөцлөх үйл ажиллагаанд хяналт шалгалт хийсэн эхний дүгнэлтээр

• "Тэс Петролиум" ХХК-ийн ШТС-7-ын дизель түлш болон АИ92 авто бензины хоёрдугаар савнаас бохирдол буюу ус илэрсэн.
• "Шунхлай” ХХК-ийн ШТС-32 АИ95 авто бензины савнаас ус илэрсэн, лаг наалдсан байдалтай гарч ирсэн.
• "Синчи Ойл" ХХК-ийн ШТС-2-ын АИ92 авто бензины хоёрдугаар савнаас ус илэрсэн.
• “Петрожамп” ХХК-ийн ШТС-2-ын АИ92 авто бензины савнаас ус илэрсэн нөхцөл байдал тогтоогдсон.

Мөн шалгалтын явцаар агуулах бөөний худалдаа, хөдөлмөр аюулгүй байдлын стандартыг хэрэгжүүлдэггүй, шатахуун тээвэрлэдэг жолооч нарт аюулгүйн зааварчилгааг бүрэн өгдөггүй, шатахуун тээвэрлэж байгаа жолооч нар мэргэжлийн үнэмлэх байхгүй, тухайн машиныг барих зөвшөөрөлгүй, бүрэн бус тээврийн машин хэрэглэсэн гэх зөрчлүүд гарсан байна. 

Эдгээр болон бусад зөрчлүүдтэй холбоотойгоор хууль бус худалдааг дэмжсэн үйл ажиллагааг таслан зогсоож, цагдаагийн байгууллагаас үргэлжлүүлэн шалгахыг ШӨХТГ-аас мэдээллээ. 

 Шуурхай.мн