Гадаад харилцааны сайд Н.Энхтайваны урилгаар Япон улсын Гадаад хэргийн сайд Мотэги Тошимицү Монгол Улсад албан ёсоор айлчлах талаар ГХЯ-наас мэдээлэл хийлээ. 

Тодруулбал Гадаад харилцааны яамны газрын захирал Э.Сарантогос оролцлоо. Тэрбээр "Энэ сарын 9,10-ны өдрүүдэд манай улсад албан ёсны айлчлал хийнэ. Айлчлалын үеэр Ерөнхийлөгч Х.Баттулга, Ерөнхий сайд У.Хүрэлсүх нарт бараалхана. Мөн Гадаад харилцааны сайд Н.Энхтайвантай албан ёсны хэлэлцээр хийнэ. 

Уулзалтын үеэр талууд Монгол Японы стратегийн түншлэлийг бататган бэхжүүлэх талаар, дээд өндөр түвшний яриа хэлэлцээрийн давтамжийг хадгалах, хамтын ажиллагааг бүхий л салбарт өргөжүүлэн гүнзгийрүүлэх талаар ярилцана. Бүс нутгийн харилцан сонирхсон асуудлаар бас ярилцах юм. Япон улсын гадаад хэргийн сайдын энэ удаагийн айлчлал Монгол Улсад хийж буй тав дахь айлчлал юм. 

Түүнчлэн он дараалж айлчлах гэж байгаагаараа онцлог. Япон улс цар тахлаас хойш айлчлалаа тодорхой хэмжээнд цөөрүүлсэн байсан. Наймдугаар сараас идэвхитэй гадаад бодлого явуулж эхэлсэн. Мөн энэ удаа өөр улсуудаар айлчлахгүйгээр зөвхөн манай улсад айлчилж байна. Энэ бүхэн юуг харуулж байна вэ гэхээр Япон улсын засгийн газар Монгол улстай стратегийн түншлэлийг бататган бэхжүүлэхэд өндөр ач холбогдол өгч байна гэж харж байна" гэлээ.