УОК-оос цар тахлын үед нийслэлд байгаа иргэд орон нутаг руу явах түр журмыг гаргаад байгаа билээ. Журмын дагуу иргэд шинжилгээг хаана хэрхэн өгөх талаар зөвлөмжийг хүргэж Эрүүл мэндийн яамны Төрийн нарийн бичгийн дарга Я.Амаржаргалын өгсөн мэдээллээр тоймлон хүргэе.

Дүүрэг бүрт шинжилгээний цэгийг 2-3 байгуулсан. Нийт нийслэлийн хэмжээнд шинжилгээний  20 цэг ажиллаж эхэлнэ. Орон нутгийг зорих иргэн www.119.mn  хаяг руу нэвтэрч өөрийн РД оруулснаар өөрт хамгийн ойр шинжилгээний цэгүүдийн байрлал гарч ирнэ. Ингэснээр очих боломжтой цэгээ сонгож очих боломжтой өдөр, цагаа сонгоно. Үүнийхээ дагуу авсан цагтаа очих ёстой.

Шинжилгээг PCR  шинжилгээний аргаар авна. Хариу 6-8 цагийн дараа гарна. Шинжилгээний хариуг   www.119.mn  цахим хуудас руу нэвтэрч авна. Шинжилгээ өгснөөс 24-48 цагийн дараа орон нутгийг зорих ёстой. Нийтийн тээвэр болон хувийн тээврийн хэрэгслээр орон нутгийг зорихдоо өөрийн биедээ шинжилгээний хариу болон QR кодтойгоо цуг явна. Эдгээр бичиг баримтыг орон нутгийн шалган нэвтрүүлэх цэгүүд дээр хянуулах ёстой.

Орон нутагтаа очоод 14 хоног гэрийн тусгаарлалтад байх бөгөөд дууссаны дараа орон нутгийн эрүүл мэндийн газартаа дахин шинжилгээ өгөх журмыг заавал дагаарай. Учир нь та халдварын голомттой бүс нутгаас халдваргүй өөрийн гэр орон, хайртай хүмүүс рүүгээ явж байгаа учраас тэднийг эрсдэлд оруулахгүйн тулд дэглэмж журмыг мөрдөх ёстой. Шинжилгээ өгөөгүй иргэнийг орон нутагт зорчуулахгүй гэдгийг анхааруулъя.

Одоогоор нийслэлээс орон нутгийг зорих 85 000 хүн хүсэлтээ ирүүлээд байгаа ажээ.

Эх сурвалж: shuurhai.mn Г.ОЧИР