"Улаанбаатар Түншлэл-2020“ Олон улсын үзэсгэлэн 45 дахь жилдээ Мишээл экспо төвд 9 дүгээр сарын 24-27-ны өдрүүдэд амжилттай зохион байгуулагдаж, энэ удаагийн үзэсгэлэнд дотоодын нийт 110 гаруй ААН-үүд оролцож бараа бүтээгдэхүүнээ танилцуулсан юм. Үзэсгэлэнд оролцогчдын бараа бүтээгдэхүүнийг МҮХАҮТ, ХХААХҮЯ, НЗДТГ, НМХГ, СХЗГ, Улаанбаатар хотын худалдааны танхим нар хамтран нийт 10 номинацаар сонгон шалгаруулж шагналыг гардууллаа. Улаанбаатар Инновацын төв дээр бойжиж буй "Непко кидс" болон "Эй Ай Контрол" хэмээх хоёр байгууллага бүтээгдхүүн үйл ажиллагаагаа танилцуулж амжилттай оролцлоо. Мөн Сүхбаатар дүүргийн Жижиг дунд үйлдвэрийг дэмжих төвийн дэргэдэх жижиг дунд үйлдвэрлэл эрхлэгч ААН оролцсон байна.
Үзэсгэлэнд ОХУ, БНСУ, Беларусь, Тайвань зэрэг улсуудаас 110 гаруй аж ахуйн нэгжүүд, дотоодын 60-н аж ахуйн нэгж, бизнес эрхлэгчид оролцож шинэ техник, технологи, бүтээгдэхүүн, үйлчилгээгээ гадаад, дотоодын үйлдвэрлэгчдэд сурталчлан, нийт 200 гаруй сая төгрөгийн борлуулалт хийгдсэн.
Нийт 4 удаагийн үзэсгэлэнгээр үндэсний үйлдвэрлэгч 470 ААНБ, ЖДҮ эрхлэгч оролцож бараа бүтээгдэхүүн үйлчилгээгээ иргэд олон нийтэд сурталчилсан. Мөн ОХУ-ын Краснодар муж, Ростовын бүс, Эрхүү муж, Чита,Алтайн хязгаар, Буриад, Туваулсаас хүнс, өргөн хэрэглээний бараа бүтээгдэхүүний 30 гаруй аж ахуйн нэгж, БНСУ-ын хүнс, өргөн хэрэглээний барааны 11 компани, Непалын эрүүл мэнд, гоо сайхны бүтээгдэхүүн, Хонконгийн сувдан эдлэлийн компани зэрэг гадаадын нийт 50 гаруй байгууллага оролцсон. Үзэсгэлэн худалдаануудад оролцсон аж ахуй нэгжүүдээс экспортын чиг баримжаатай бүтээгдэхүүн үйлчилгээг шалгаруулж, мэдээллийн сан үүсгэсэн.
