Цахилгааны хэрэглээнд хязгаар тогтоож, зөрүүг иргэн, ААН хариуцах тухай журмыг Эрчим хүчний сайд Н.Тавинбэх танилцууллаа.

Тэрээр "Цахилгаан, дулаан, усных хэрэглээг төрөөс даах шийдвэрийг Засгийн газраас гаргасан. Үүнтэй холбоотой журмыг өнөөдрийн Засгийн газрын хуралдаанаас гаргалаа. Уг журмаар хэрэглэгч, цахилгаан дулаан үйлдвэрлэгчийн үүргийг тодорхой зааж өгсөн.

Өнгөрсөн оны мөн үеийн цахилгаан, дулааны хэрэглээтэй тэнцэх хэмжээний зардлыг төрөөс даана, хэтэрсэн тохиолдолд хэрэглэгч өөрөө хариуцна. Төрөөс цахилгаан, дулааны төлбөрийг хариуцахтай холбоотойгоор хэрэглээний өсөлт огцом нэмэгдэж байна. Энэ өсөлтийг бид урьдчилж тооцоолж байсан. Гэхдээ бидний тооцоолсноос өндөр байна. Ялангуяа оргил ачааллын үе буюу 17-21 цагт давж гарч байгаа учраас энэ цагуудад ААН-үүд хэрэглээгээ 20 хүртэл хувиар бууруулах, айл өрхүүд энэ цагт цахилгаан эрчим хүчээр дулааны шийдэхгүй байх үүргийг хэрэглэгчдэд хариуцуулж байна. 

Стандартын шаардлага, галын аюулгүй байдал хангасан цахилгаан хэрэгсэл ашиглахыг энэ журмаар үүрэг болгож байгаа. Төрөөс цахилгаан, дулааны төлбөрийг даахтай холбоотой шийдвэр гарснаас хойш эрчим хүчний зохиомол хэрэглээ нэлээд гарч байна. Ашигладаггүй талбай, байраа цахилгаанаар халааж байна. Халаалтын зориулалттай ашиглаж байгаа цахилгааны тоног төхөөрөмж, утас стандартын бус байна. Энэ нь хэрэглээг нэмэгдүүлдэг. Тийм учраас үүнийг хориглох, хязгаарлах зорилгоор энэ журмыг хэрэгжүүлнэ" гэлээ.

Эх сурвалж: shuurhai.mn Г.ОЧИР