Парламент өөрсдийн баталсан хуулийнхаа хөлд ороогдсон асуудлыг өнөөдөр хэлэлцлээ. Тодруулбал, ҮХЦ-ийн УИХ-аар 2020 оны 1 дүгээр сард баталсан Эрүүгийн хуульд нэмэлт өөрчлөлт оруулах хуулийн Дагаж мөрдөх журмын тухай хуульд орсон авлига албан тушаалын хэрэгт холбогдон шалгагдаж байгаа болон шийдвэр гарсан хүнийг сэргээн шалгах тогтолцоо нь Үндсэн хуулийг зөрчсөн хэмээн үзэж 12 дугаар дүгнэлтийг хэлэлцэж байгаа юм. Хэдийгээр авлига албан тушаалын гэмт хэрэгтний хөөн хэлэлцэх хугацааг сэргээж хохирлыг нөхөн төлүүлэх боломжтой ч энэ нь хуулийг буцаан хэрэглэж хүний эрхийг ноцтой зөрчих үйлдэл болно хэмээн ҮХЦ үзээд байгаа.
Энэ талаар парламент дахь цөөн хэдэн хуульч гишүүдийн нэг УИХ-ын гишүүн Ж.Сүхбаатар “Энэ асуудал бол Монгол төрийн хувьд том алдаа гаргасан тухай юм. Би жишээ нь хуульч. Хоёр талын шахалтад шийдвэр гаргаж байна. Гэхдээ би өнөөдөр Цэцийн дүгнэлтийг хүлээж авахгүй гэж саналаа өгнө. Цэцийн агуулгатай санал нийлэхгүйдээ биш. Хөөн хэлэлцэх хугацаатай холбоотой Эрүүгийн хуульд 2017 онд оруулсан алдаанаас болж ял завших боломж гарсан. Түүнийг 2020 оны 1 дүгээр сард засах оролдлого хийсэн. Эрүүгийн хариуцлага гарцаагүй байх зарчимтай. Ийм байж шударга ёс хангагддаг” хэмээж байна.
Эх сурвалж: Shuurhai.mn Г.ОЧИР
