Монгол Улс дотооддоо цахилгаан эрчим хүчний хэрэглээгээ 98 хувь хангадаг боллоо. Дөрөвдүгээр цахилгаан станцын хүчин чадлыг 89 МВт аар нэмэгдүүлсэн өргөтгөлийн нээлт өнөөдөр болов.
Ингэснээр ОХУ-аас авдаг импортыг 2 дахин бууруулж байна. Өргөтгөлийн нээлтийн үеэр Ерөнхий сайд У.Хүрэлсүх, Эрчим хүчний сайд Н.Тавинбэх нар сэтгүүлчдийн асуултад хариуллаа.
-IV цахилгаан станцын хүчин чадал 89 МВт-аар нэмэгдэхээр гадаадаас авах хэрэглээ буурах уу. Гадаад валютын гарах урсгалыг хэдэн хувиар бууруулна гэсэн тооцоо хийсэн бэ?
-Н.Тавинбэх: Импортоор авдаг цахилгаан хүчин чадлын хэмжээ өнөөдрийн нэмэгдүүлсэн хэмжээгээр буурч байгаа. Энэ хэрээр төлбөр тооцоо буурна гэж ойлгож болно. Үүнээс өмнө ОХУ-аас импортолдог цахилгаан эрчим хүчний хэмжээ 250МВт орчим байсан. Гуравдугаар машин ашиглалтад орж, системд ачаалал нийлүүлж эхэлснээс хойш өнөөдрийн байдлаар импортоор авдаг цахилгаан эрчим хүчний хэмжээ хоёр дахин буюу 110МВт-аас хэтрэхгүй байна.
-Цаашдаа Эрдэнэбүрэн, Тавантолгойн цахилгаан станцыг хэдэн жилийн хугацаанд барьж байгуулахаар төлөвлөсөн бэ?
-Н.Тавинбэх: Засгийн газрын үйл ажиллагааны хөтөлбөрт дулааны цахилгаан станц IV-н хүчин чадлыг 89МВт-аар өргөтгөхөөр тусгасан байсан. Энэ арга хэмжээг бид богино хугацаанд амжилттай хэрэгжүүллээ. Энэ оны нэгдүгээр сарын 13-нд Эрдэнэбүрэнгийн усан цахилгаан станцын гүйцэтгэгчийг сонгон шалгаруулах тендер зарлана. Оюутолгой 100 хувь импортоор цахилгаан эрчим хүчээ авдаг. Манай улсын импортоор авдаг цахилгаан эрчим хүчний 80 хувийг Оюутолгой авдаг. Тавантолгойн дулааны цахилгаан станц ашиглалтад орсноор бид Оюутолгойн эрчим хүчний хэрэглээг дотоодоосоо бүрэн хангах боломжтой болно.
-Засгийн газрын үйл ажиллагааны хөтөлбөр цар тахалтай байгаа хэдий ч хэрхэн биелнэ гэж харж байна вэ?
-У.Хүрэлсүх: Цар тахал томоохон бүтээн байгуулалтын ажилд саад болж байна. Гэхдээ бид эхлүүлсэн ажлаа дуусгана. Тавантолгойн цахилгаан станцыг барих ажлын зураг төсөл эхлээд явж байна. Эрдэнэбүрэнгийн цахилгаан станцын зураг төслийн ажил дууссан. Хөрөнгө санхүү нь шийдэгдсэн. Дорнод, Амгалан цахилгааны станцыг өргөтгөх ажил бий. Хэд хэдэн цахилгаан станцыг ойрын хугацаанд барьж ашиглалтад оруулна. Үүнийг шийдэхгүйгээр улс орон хөгжинө гэдэг хэцүү. Дотоодын эрчим хүчээр улс орноо сайн хангах ёстой. Эдгээр ажлууд төлөвлөсөн хугацааны дагуу эхэлнэ.
Эх сурвалж: shuurhai.mn Г.ОЧИР
