"Жи тайм"-ын хохирогчид Улсын дээд шүүхэд гомдол гаргаж эхэлжээ

Энэ мэдээ хуучирсан буюу 2021/01/26-нд нийтлэгдсэн мэдээ болно.

Шуурхай

Ангилал

Эдийн засаг

Огноо

Унших

1 минут 43 секунд

“Жи тайм“-ын хохирогчид Улсын дээд шүүхэд гомдол гаргаж эхэлжээ

“Жи-тайм” гэх тодотголтой шүүгдэгч Э.Оюунчимэгт холбогдох хэргийг Баянгол дүүргийн Эрүүгийн хэргийн анхан шатны шүүх 2020 оны 7 дугаар сарын 17-ны өдөр хянан хэлэлцэж шийдвэрлэсэн байдаг. Тодруулбал, Эрүүгийн хэргийн анхан шатны шүүхээс шүүгдэгч Э.Оюунчимэгийг зохиомол байдал зориуд бий болгож бодит байдлыг нуух замаар бусдыг төөрөгдөлд оруулж, өмчлөгчийн эд хөрөнгийг шилжүүлэн авч их хэмжээний хохирол учруулсан гэмт хэрэгт хамжигчаар оролцсон гэм буруутайд тооцож Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад зааснаар 5 жилийн хорих ялыг нээлттэй хорих ангид эдлүүлэхээр шийдвэрлэсэн билээ.

Улмаар уг хэргийн хохирогч, иргэний хариуцагч, шүүгдэгч, тэдгээрийн өмгөөлөгч нар давж заалдах гомдол гаргасныг Нийслэлийн Эрүүгийн хэргийн давж заалдах шатны шүүх 2020 оны 12 дугаар сарын 09-ний өдөр хэлэлцээд анхан шатны шүүхийн шийдвэрт гомдол гаргасан зарим оролцогч нарт олгох болон гаргуулах төлбөрт өөрчлөлт оруулж, шийтгэх тогтоолын бусад заалтыг хэвээр үлдээжээ.

Гэвч уг шийдвэрийг эсэргүүцэж хохирогчид Улсын дээд шүүхэд гомдол гаргасаар байгаа аж. Шүүхийн зүгээс гомдлуудыг талуудад танилцуулж дууссаны дараа Улсын дээд шүүхэд хэргийг хүргүүлнэ хэмээн Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газраас мэдээлж байна.

Эх сурвалж: shuurhai.mn Г.ОЧИР