Нийслэл даяар “Нэг өрх нэг шинжилгээ” арга хэмжээ гурав дахь өдөртөө үргэлжилж байна. Өчигдөр хийсэн нийт шинжилгээгээр 46 хүнээс халдвар илэрчээ. Эдгээрийн 44 нь өмнө нь батлагдаж тохиолдлуудын ойрын хавьтлаар тусгаарлагдаж байсан хүмүүс байсан бол 2 нь “Нэг өрх нэг шинжилгээ”-ний хүрээнд илэрчээ. Тэдгээр иргэд БЗД, СХД-ийн иргэд бөгөөд энэ нь шинэ голомт гэж үзэж болно гэж Эрүүл мэндийн сайд Н.Энхболд онцоллоо.

Харин уржигдар нийт халдвар 40 байсан бөгөөд 38 нь тусгаарлалтад байсан хүмүүс, 2 нь иргэдийн дундаас гарсан байгаа юм.

УОК-оос онцолж буйгаар өнгөрсөн 2 өдрийн хугацаанд нийт илэрсэн халдварын дотроос “Нэг өрх нэг шинжилгээ” арга хэмжээний хүрээнд 4 хүнээс илэрсэн нь өмнө нь тооцоолж байснаас харьцангуй бага байгаа аж. Тархвар судлаачид массын дунд далд хэлбэрээр халдвар тээгчид их байх магадлалтай гэж тооцоолж байжээ.

Өөрөөр хэлбэл, хамгийн идэвхтэй 30 голомтод байгаа 100000 өрхөөс эхний 3 өдөр шинжилгээ авах тооцоотой. Одоогийн байдлаар 60000 өрхийн шинжилгээний хариу гарсан. Өнөөдөр нэмж 20000 өрхийн хариу гарна. Нэмж 20000 өрхөөс шинжилгээ авна. Ингэснээр хамгийн идэвхтэй 30 голомтод байгаа 100000 өрхийн дүр зураг гарах аж. одоогийн байдлаар нийт хүмүүсийн 60 хувийн нь хариу гарсан бөгөөд нийт 4 халдвар илэрсэн нь өмнө нь тооцоолж байснаас иргэдийн дунд халдвар өндөр тархаагүй гэж үзэж байгаа гэнэ.

Эх сурвалж: shuurhai.mn Г.ОЧИР