Төрийн соёрхолт дуучин Д.Болдыг ЦЕГ-аас эрэн сурвалжилж эхэлсэн талаарх мэдээлэл олны анхаарлыг татаад байна. Д.Болд өөрөө гэртээ байгаагаа онцолж байгаа. Өмнө ч эрэн сурвалжилж байгаа хүмүүс олны нүдэн дээр ажиллаж амьдарч байгаа тохиолдол гарч байсан юм.
Цагдаагийн байгууллагын эрэн сурвалжлага олны анхаарлыг татах болсон учир шалтгааны талаар хуульч, өмгөөлөгч Б.Мэргэн ийнхүү тайлбарлажээ.
Тэрээр "Дуучин Д.Болдыг эрэн сурвалжилж байна гэхээр хүмүүс өөрөө алга болчихсон эсвэл гэмт хэрэг хийгээд зугтчихсан гэж ойлгоод байх шиг байна. Цагдаагийн цахим хуудаст эрэн сурвалжилж байгаа мэдээ байх нь байна. Гэхдээ иргэний хэргийн шүүхийн шийдвэрээр сайтдаа байршуулсан буюу “хайж” байгаа юм байна.
Энгийнээр тайлбарлавал хэн нэгэн иргэний нэхэмжлэл гаргасныг Болдод гардуулах гэсэн боловч бүртгэлтэй хаяг дээрээ байхгүй тохиолдолд нэхэмжлэгчийн хүсэлтээр шүүгчийн захирамж гарч цагдаагийн байгууллагад шилжүүлснийг сайтдаа эрэн сурвалжилж байна гэж байршуулдаг гэсэн үг.
Манай энэ тогтолцоо нэлээд учир дутагдалтай л даа. Улс төрчид, олны танил хүмүүс нүдэн дээр ил яваад байхад л хаяг дээрээ алга гээд эрэн сурвалжлаад байх жишээний. УИХ-ын гишүүн ордонд ажлаа хийгээд зурагтаар гараад байхад л хэдэн жил эрж хайгаад л байдаг" гэжээ.
Эх сурвалж: shuurhai.mn Г.ОЧИР
