Монгол эрдэмтэд шүлснээс коронавирус илрүүлэх оношлуур бүтээсэн талаар бид өмнө нь мэдээлж байсан. Тэгвэл тухайн оношлуурыг хэрэглээнд нэвтрүүлэх зөвшөөрлөө өнөөдөр хүлээн авчээ. 

Уг оношлуурыг хэрэглээнд нэвтрүүлэх гэрчилгээг ЭМЯ-ны Төрийн нарийн бичгийн даргын 2021 оны гуравдугаар сарын 26-ны өдрийн батламжаар гардуулж буй аж.

Шүлснээс коронавирусийг тодорхойлох оношлуур нь сорьцыг лабораторид хийснээс хойш 90 минутын дотор хариуг гаргах бөгөөд шинжилгээ хийх өртөг нь 31,200 төгрөг болох аж. 

Өнөөдөр Монгол Улсад хэрэглэж байгаа оношлуурын цомгууд коронавирусийн 100 хуулбар хүний биед байхад тодорхойлох чадвартай. Тэгвэл шүлснээс коронавирусийг илрүүлэх энэхүү PCR-ийн оношлуур нь хүний биед коронавирусийн 6-12 хуулбар байхад илрүүлэх чадвартай буюу нэлээд өндөр мэдрэг чанартай. Бид уг оношлуурыг коронавирусийн гомологийн 20 гаруй төрлийн вирустэй харьцуулан судалгаа хийхэд ямар нэг байдлаар солилцох урвалд ороогүй гэдгийг оношлуур зохион байгуулагчид ярьж байна. 

Энэхүү оношлуураар шинжилгээ хийх өртөг 31,200 төгрөг болж буй. Мөн мэдрэг чанар нь маш өндөр учраас бид 4, 6, 10 сорьцыг нэг дор хийх байдлаар туршиж үзэхэд шинжилгээний хариу, чанарт нь нөлөөлдөггүй болох нь тогтоогдсон. Тиймээс нэгж шинжилгээний өртөг нь 7,800 төгрөг хүртэл буурах боломжтой гэнэ.

Шүлснээс коронавирусийг тодорхойлох оношлуурыг Япон, АНУ, Филиппин, ХБНГУ, Унгар, БНСУ хэрэглэж байгаа боловч иж бүрдлээр нь гаргаж аваад улс нь бүртгэсэн тохиолдол байдаггүй аж. 

Монгол Улс дөрөвдүгээр сарын 1-нээс албан ёсоор шүлснээс коронавирусийг тодорхойлж эхлэхээр болжээ.

Эх сурвалж: shuurhai.mn