Ерөнхий сайд У.Хүрэлсүхээр ахлуулсан Засгийн газрын сайд нар ажлаа аваад хагас жил болж байна. Парламентаас аравдугаар сарын 18, 19-ний өдөр батламжаа өвөртөлсөн сайд нар өдөртөө л тамга тэмдгээ гардсан.
Мөн энэ Засгийн газрын сайд нарын нэг тод тамга нь бүгд “давхар дээл”-тэй. Үүнийгээ УИХ-ын гишүүдэд салбараа ойлгуулахад арай дөхөм гэж зөвтгөж байсан удаатай.
Манайд төрийн эрхэнд аль нам гарахаас шалтгаалж шат шатандаа төрийн албаны халаа, сэлгээ хийгддэг байдал ужгирсан. Нэг ёсондоо сонгууль болгоны дараа, Засгийн газар солигдох бүрт л яригдаад өнгөрдөг “хуучин” сэдэв болжээ. Хэдийгээр Ерөнхий сайд У.Хүрэлсүх “Халаа сэлгээ хийж болохгүй, хөдөлгөөн оруулахгүй” хэмээн мэдэгдсэн ч яамдад цөөнгүй албан тушаалын томилгоо, халаа сэлгээ хийгдэж байгаа аж. Тиймээс энэ удаад “Зууны мэдээ” сонин ажлаа аваад удаагүй байгаа сайд нарын халаа сэлгээний “ажил”-ыг тодрууллаа. Эхний ээлжинд Боловсрол, соёл, шинжлэх ухаан, спортын яам, Батлан хамгаалах яамыг онцолж байна.
БСШУСЯ: ДЭД САЙДЫН СУУДАЛ ЭЗГҮЙРЧ, ТНБД-ЫН ТОМИЛГОО ГАЦАВ
Боловсрол, соёл, шинжлэх ухаан, спортын яам сүүлийн нэг жилд 2-3 ч сайд солиод амжсан хөдөлгөөнтэй салбараар тодроод буй. Тэгвэл хамгийн сүүлд У.Хүрэлсүхийн танхимд тус салбарыг Ц.Цогзолмаад даатгасан юм. Түүнийг сүүлийн дөрвөн жилд Нийгмийн ардчилал Монголын эмэгтэйчүүдийн холбоог удирдаж байснаар нь мэднэ. Ц.Цогзолмаа сайд тамгаа хүлээж авсныхаа дараахан “Хөдөлгөөн хийхгүйгээр ажил урагшлахгүй гэдгийг мэдэрлээ. Ялангуяа газрын дарга нарын түвшинд халаа сэлгээ хийнэ гэдгээ нуухгүй. Утсаа салгаад алга болдог. Эсвэл ид ачааллын үеэр эмнэлэгт хэвтчихдэг хүмүүс байна. Халж солихдоо найз нөхдөөсөө авчрахгүй. Бэлтгэгдсэн сайн менежерүүдээр багаа бүрдүүлнэ” гэж хэлж байсан юм.
Тэгвэл Ц.Цогзолмаа сайд ажлаа авангуутаа Төрийн нарийн бичгийн дарга Ж.Болормааг ажлаас чөлөөлсөн. Түүний оронд өнөөдрийг хүртэл хүн томилоогүй байгаа ч Г.Чулуунбаатар сайдын үед ажлаас чөлөөлөгдөж буцаан томилогдох шүүхийн шийдвэр нь гарчихаад байгаа Б.Баярсайханы томилгоо хариулт нэхсээр найман сар болж байна. Захиргааны хэргийн анхан шатны шүүхээс Б.Баярсайханыг ажлаас чөлөөлсөн Засгийн газрын тогтоолыг хүчингүй болгож, ажилд нь буцаан томилох шийдвэр гаргасан ч өнөөг хүртэл шийдэгдэхгүй гацсаар байгаагийн шалтгаан тодорхойгүй. Энэ хугацаанд яамны өдөр тутмын ажлыг удирдлагаар хангах, дүрэм, заавар журмыг хуульд нийцүүлэн мөрдүүлэх, мэргэжил, арга зүйн зөвлөгөө, өгөх, үүрэгтэй Төрийн нарийн бичгийн даргын ажил цалгардаж буйг салбарынхан хэлсээр буй. Үүнтэй зэрэгцэн БСШУСЯ-ны дэд сайдын суудал ч эзгүйрч хоцров. Дэд сайд Ё.Отгонбаяр АНУ-д улсаа төлөөлөх Элчин сайдын томилолт өвөртөлсөн. Оронд нь МАН-аас хэд хэдэн хүний нэр яригдаж байгаа ч албажаагүй байгаа юм.
Үүнээс гадна Ц.Цогзолмаа сайд хэлсэн ёсоороо газрын дарга нарын түвшинд хэд хэдэн халаа сэлгээ хийж, заримыг нь өөр ажилд шилжүүлжээ. Тодруулбал, БСШУСЯ-ны Соёлын бодлого зохицуулалтын газрын дарга Н.Болдын оронд Б. Сэргэлэнг томилсон байна. Мөн яамны Санхүү ,хөрөнгө оруулалтын газрын дарга С.Нансалмаагийн оронд Х.Галсанхүү, Сургуулийн өмнөх бага боловсролын бодлогын газрын дарга С.Болормаагийн оронд Б.Үүлэнсолонгыг томилжээ. Ингэхдээ С.Нансалмааг Үйлдвэрлэлийн хэлтсийн даргаар, С.Болормааг өөр ажилд шилжүүлсэн байна.
Ц.Цогзолмаа сайдын бас нэг дуулиан нь түүний зөвлөх, бас дотны найз нь гэгдээд байсан С.Мөнхөөлэйгийн яамыг бужигнуулсан явдал. Төрийн нарийн бичгийн даргын ажлаас чөлөөлөгдсөн Ж.Болормаа “Ц.Цогзолмаа сайд өргөн мэдүүлсэн бичигтээ “Сайдаар томилогдсон хугацаанд надтай хамтран ажиллаагүй, надад туслаагүй” гэсэн үндэслэлийг Засгийн газрын хуралдаанд оруулсан. Мөн түүний зөвлөх С.Мөнхөөлэй хүн бүрийг харааж загнадаг, уурладаг байсан” гэж хэвлэлд ярьсан удаатай.
Мөн АТГ-аас “БСШУС-ын сайд Ц.Цогзолмаатай холбоотой гурван удаагийн гомдол ирсэн. БСШУСЯ-ны Төрийн нарийн бичгийн даргаар ажиллаж байсан н.Болормаагаас, тус яамны сайд Ц.Цогзолмаа, төрийн захиргаа удирдлагын газрын даргыг түр орлон гүйцэтгэгч С.Мөнхөөлэй нартай холбоотой гомдол мэдээллийг ирүүлсэн. С.Мөнхөөлэй гэдэг хүний томилгоотой холбоотой асуудал нь хууль тогтоомжид нийцсэн үү, үгүй юу гэдгийг шалгуулахаар төрийн албаны зөвлөл рүү албан бичиг хүргүүлсэн байгаа” хэмээн мэдэгдсэн юм.
Түүнчлэн салбарын бодлогыг зангидаж буй сайд нарт зөвлөж буй эрхмүүдийг сонирхож үзвэл БСШУС-ын сайд Ц.Цогзолмаад шинжлэх ухааны салбарын хүмүүс болох Б.Ганбат, С.Мөнхбат нар зөвлөж байгаа юм байна.
БХЯ: “БӨРТЭ” ТӨҮГ, ҮБХИС-ИЙН ЗАХИРЛЫГ ШИНЭЭР ТОМИЛЖЭЭ
Батлан хамгаалахын яаманд халаа сэлгээ харьцангуй бага явагдаж байгаа гэхэд болно. Гэхдээ Н.Энхболд сайд хөдөлгөөгүй биш бас хөдөлгөсөн. Тэрээр сайд болохынхоо өмнө “Батлах хамгаалах салбар бол тусгай алба. Тиймээс халаа сэлгээ хийхгүй” хэмээж байсан. Гэхдээ дараах томилгоонууд дуулдаж байна. “Бөртэ” ТӨҮГ-ын даргаар хурандаа Б.Эрхэмбаярыг томилсон. Түүнчлэн БХЯ-ны гадаад хамтын ажиллагааны газрын даргаар ажиллаж байсан бригадын генерал Ж.Сосорбарамыг чөлөөлж, дэд хурандаа Э.Гансүхийг томилжээ. Э.Гансүхийн хувьд өмнө нь БХЯ-нд ажиллаж байсан юм.
Мөн ҮБХИС-ийн захирал, хошууч генерал Я.Чойжамц тэтгэвэртэй гарсантай холбогдуулан тус сургуулийн дэд захирал, хурандаа П.Жаргаланг түр орлон гүйцэтгэгчээр томилон ажиллуулж байна. Зэвсэгт хүчний зарим ангийн дарга нарыг ч гэсэн сэлгэжээ.
Батлан хамгаалахын сайд Н.Энхболд хоёр зөвлөхтэйгөөр ажиллаж байна. Бэлтгэл дэслэгч генерал Ц.Дашзэвэг цэргийн чиг үүргийн талаар зөвлөдөг бол Д.Бүрэнтогтох УИХ-ын гишүүнийх нь хувьд зөвлөдөг.
С.УЯНГА, Т.БАТСАЙХАН
Эх сурвалж: “Зууны мэдээ” сонин
