УИХ-ын гишүүн асан С.Баярцогт АТГ аас шалгаж байгаатай холбоотой хэвлэлийн бага хурал Монгол Ньюс мэдээллийн төвд 3 сарын 21 ны 14 цагт боллоо. Тэрээр хэлэхдээ Би улс төрд 20 гаруй жил ажиллахдаа нэг ч удаа авилгал, хээл хахуулийн асуудалд холбогдож байгаагүй. Оюутолгойн гэрээг байгуулснаас хойш л ийм асуудал яригдаж эхэлсэн. АТГ, Швейцарийн хуулийн байгууллагатай хамтраад надад эрүүгийн хэрэг үүсгэж, шалгаж эхэлсэнд би баяртай байна. Үнэн зөвийг нь олж өгөхийг хүсч байна.
Оюутолгойн төсөл 70-100 жилийн настай том төсөл. Энэ төслийг хийсэн хүмүүсийг шалгах хэрэгтэй, гэрээ хийсэн хүмүүс авлига хээл хахууль авсан гэх яриа олон жил яригдлаа. Би нэг зүйлд баяртай байна. МУ-ын АТГ, Швейцарын холбооны улсын Ерөнхий Прокурорын газартай хамтран надад эрүүгийн хэрэг үүсгэн шалгаж байгаа. Тиймээс хэргийн үнэн мөнөөр нэг талд гарган шийдэж хүмүүсийн эргэлзээг тайлах боломж байна гэдэгт итгэж байна.
Оюутолгойн гэрээ хэрэгжээд 9 дэх жилийнхээ нүүрийг үзэж байна. Оюутолгойн гэрээг хийсэн хүний хувьд мэдээж хардаж сэрдэх, 70 жилийн турш хэрэгжих төслийн хувьд хамтрагчтайгаа үл ойлголцох, Монголын гаралтай бараа материалыг нийлүүлэх, татварын асуудал гэх мэт олон асуудал яригдана. Төгс төгөлдөр гэрээ гэж хаана ч байхгүй. Энэ гэрээ сайн болсон. Гэрээ хэлэлцээрийг удирдсан хүний хувьд гэрээг сайжруулах хэлэлцээрийг хийсээр байгаа. 2011 онд хувь нийлүүлэгчдийн гэрээнд өөрчлөлт хийсэн. Би гэрээг удирдсан хүний хувьд 2009 онд Монголын хүртэх хувийг 3 тэрбум ам.доллараар сайжруулсан. 2011 онд хийсэн гэрээгээр тэрбум ам.доллараар сайжруулсан.
Энэ өөрчлөлтөд 7 жил тутам хөрөнгө оруулагчдын хүүгийн хэмжээг харилцан ашигтай байх өөрчлөлтийг оруулсан. Дахин хүүг бууруулах зохистой төвшинд байлгах асуудал яригдаж байгаа. Энэ гэрээг анх хийсэн хүмүүс чин шударгаар хийсэн эсэх Монголд ашигтай эсэх асуудал энэ шалгалтын үр дүнд тодорхой болно.
Би олон жил Монголын улс төрд өндөр албан тушаал хашсан хүн. Гэр бүлээ болон өөрийгөө аваад явах оюун ухаан болон бизнесын чадвартай хүний хувьд их хэмжээний мөнгө хэрэггүй. Хүн бүр хардах эрхтэй гэсэн нэрийн дор улс төрийн өрсөлдөгчөө зайлуулах, Монгол улсын эдийн засаг, аюулгүй байдлын тулгуур болсон энэ төслийн нэр хүндийг гутаах зогсоох, оролцогч талыг өөрчлөх гэсэн санаархал гадны улс орнууд, компаниудад үргэлж байдаг.
Ройтер бол нэр хүндтэй агентлаг. Би тэр мэдээг уншсан. Маш их субьектив мэдээлэлтэй байсан. Тэнд бичигдсэн хоёр тоо үнэн байна. 1996 онд би Германд сургууль төгсөөд ирэхдээ 20,000 дойч маркийн төсөлтэй ирж байсан анхны Монгол оюутан. Дараа нь 2001 онд би Колумбийн их сургуульд сурахдаа 70,000 гаруй долларын тэтгэлэг авсан.
Ингээд өөрийн хийж байсан бизнесээ найзуудтайгаа нийлээд, дээрээс нь Монголын нэртэй бизнесмэнээс зээл аваад 8.2 сая еврог Швейцарт 5 сард нээлгэсэн байсан дансандаа хийлгэсэн. Тэрний нэг данс нь офшортой холбоотой данс. Харамсалтай нь 2008 онд хямрал болсон учраас зээл өгсөн бизнесмэн зээлээ бүгдийг эргүүлж авсан. Үлдэгдэл мөнгө нь 2013 онд компани хаагдах үед бүгд дууссан. Одоо надад Швейцарт ямар нэгэн данс байхгүй гэж мэдэгдлээ. Мөн тэрээр зээл авсан нэр бүхий бизнесмений нэрийг нууцалсан бөгөөд АТГ-аас шалгалт хийх явцад мөрдөн байцаалтын үеэр ил болох нь тодорхой тул тухайн бизнесмэний нэрийг дурдаагүй байна.
Ардчилсан намын гаргасан шийдвэрийн тухайд - Надаас хэн ч юу ч асуугаагүй. Шүүхээр асуудлыг шийдэж дуустал хүнийг гэм буруутай гэж үздэггүй. Манай намын удирдлагууд ийм дуулиан шуугианыг далимдуулан маш богино хугацаанд намаас хөөж байна. Үнэндээ бол инээдтэй хэрэг.
Оюутолгойн гэрээ үнэхээр зөв, ямар ч авлигагүй сайн гэрээ болсон гэдгийг харуулна. Үүнийг би харуулахгүй. Монгол, Швейцарийн хамтарсан шалгалтын баг харуулна. Би хууль хүчний байгууллагад хүндэтгэлтэй ханддаг. Ардчилсан нийгэмд алдаж оноод, хөгжиж дэвшээд явж байна. Гэхдээ бид үндсэн суурь зарчмаа хамгаалах ёстой. гэсэн мэдээллийг өгсөн байна.
Эх сурвалж Шуурхай.мн
